2023: APR FC yaje imbere ya Rayon Sports mu makipe akomeye muri Afurika

Ikipe ya APR FC yaje imbere ya mukeba wayo Rayon Sports ku rutonde rugaragaza uko amakipe arutana gukomera ku mugabane wa Afurika.

Ni urutonde rwakozwe n’urubuga rwitwa Opta rwo mu Bwongereza ruzwiho gukora intonde zitandukanye mu mupira w’amaguru rwifashishije statistics (ibarurishamibare).

Urutonde uru rubuga ruheruka gusohora mu kugaragaza uko amakipe arutana gukomera muri 2023, rushyira APR FC ku mwanya wa 154 muri Afurika ndetse n’uwa 1524 ku Isi.

Iyi kipe y’Ingabo z’Igihugu ikanaba ikipe ya mbere ifite ibikombe byinshi mu Rwanda yahawe impuzandengo y’amanota 64.8%.

Rayon Sports zihora zihanganye yashyizwe ku mwanya wa 349 muri Afurika, igakurikirwa Ku wa 350 na Kiyovu Sports.

Mamelodi Sundowns yo muri Afurika y’Epfo ni yo yashyizwe ku mwanya wa mbere muri Afurika n’uwa 98 ku Isi, igakurikirwa na Al Ahly yo mu Misiri ya 173 ku Isi.

Izindi kipe ziri mu icumi za mbere ni Wydad Casablanca yo muri Maroc, Pyramids yo mu Misiri, Raja Casablanca yo muri Maroc, FAR Rabat na Fus Rabat zo muri Maroc, Young Africans na Simba Sports Club zo muri Tanzania cyo kimwe na Etoile du Sahel yo muri Tunisia.

Manchester City iheruka gutorwa nk’ikipe nziza y’umwaka ubwo hatangwaga ibihembo bya Ballon d’Or ni yo ifatwa nk’ikipe ikomeye kurusha izindi ku Isi muri uyu mwaka wa 2023, igakurikirwa na Liverpool.

Izindi kipe ni Bayern Mà¼nich yo mu Budage, Arsenal yo mu Bwongereza, Real Madrid yo muri Espagne, Inter Milan na Napoli zo mu Butaliyani, Leipzig yo mu Budage, FC Barcelona yo muri Espagne na Manchester United yo mu Bwongereza iri ku mwanya wa 10.