Igihugu cya Qatar cyafunze by’agateganyo ikirere cyacyo nyuma y’ibitero Amerika yagabye kuri sitasiyo za kirimbuzi za Iran, bikomeje guteza umwuka mubi mu karere.
Minisiteri y’Ububanyi n’Amahanga ya Qatar yatangaje ko iki cyemezo gifashwe mu rwego rwo kurinda umutekano w’abaturage, abatuye igihugu ndetse n’abashyitsi bari muri Qatar. Yavuze ko ari igikorwa cyo kwirinda gikurikira uko ibintu bihagaze muri aka karere.
Qatar, icumbikiye ikigo cya gisirikare cya Amerika kinini mu karere, yafashe iki cyemezo nyuma y’uko Iran yongeye gutangaza ko izihorera kuri Amerika kubera ibitero byagabwe ku bikorwa bya kirimbuzi byayo.
Abategetsi ba Qatar bavuga ko n’ubwo ambasade za Amerika n’u Bwongereza zasabye abaturage bazo kuguma mu ngo zabo, umutekano w’imbere mu gihugu wifashe neza.
Qatar ikomeje gukoresha inzira za dipolomasi kugira ngo ifashe kugabanya ubushyamirane bukomeje kwiyongera hagati ya Amerika na Iran.
