Perezida wa Algeria Abdelaziz Bouteflika azegura ku mwanya w’umukuru w’igihugu mbere yuko manda ye irangira tariki ya 28 Mata 2019 nk’uko bitangazwa n’ikigo cy’itangazamakuru cya leta( APS).
Mu itangazo ryavuye mu biro by’umukuru w’iki gihugu rigira riti’’Perezida azakomeza kugenzura ko ibigo bya leta bikomeza gukora muri iki gihe cyo guhindura ubuyobozi . Iyegura rye rizaba mbere ya 28 Mata 2019’’
Aya makuru aje nyuma yuko kuva muri Gashyantare 2019 abaturage batangiye imyigaragambyo bamusaba kwegura nyuma yuko atangaje ko aziyamamariza manda ya gatanu . Nyuma y’imyigaragambyo n’igitutu cy’abaturage byatumye yisubiraho atangaza ko ataziyamamariza indi manda.
Nyuma yo gutangaza ko ataziyamamariza indi manda, amatora yahise asubikwa. Gusa ntabwo hatangajwe igihe amatora azabera. Uyu mukambwe w’imyaka 82 y’amavuko, amaze imyaka 20 ku butegetsi dore ko yagiye ku butegetsi 1999.
Mu kwezi gushize, perezida Bouteflika udakunze kugaragara cyane mu ruhame kuva yafatwa n’indwara yo mu bwonko muri 2013, yahinduye guverinoma . Aho mu baminisitiri 27 bari bagize guverinoma, 21 bose yarabahinduye.
Nkurunziza Viateur @Bwiza.com
