Kuri uyu wa Kane itariki ya 10 Mata 2025, Ingabo z’u Rwanda zoherejwe i Mbaiki na Bagandou, hamwe n’abayobozi b’inzego z’ibanze n’inzego z’umutekano bitabiriye Kwibuka ku nshuro ya 31 Jenoside yakorewe Abatutsi mu 1994 mu Rwanda.
Ibirori byitabiriwe na Guverineri w’Intara ya Lobaye, Lydie Georgette Gahoro, Umuyobozi wa Mbaiki, Abayobozi ba FACA, aba Polisi na Gendarmerie bo mu Ntara ya Lobaye.
Guverineri w’Intara ya Lobaye mu ijambo rye yavuze ko u Rwanda rwagize impinduka zidasanzwe kuva mu 1994, ruva mu mahano ya Jenoside ruhinduka urumuri rw’amizero no kwihangana.
Yongeyeho ko igihugu kimaze gutera intambwe igaragara mu bwiyunge, mu kwiyubaka, no mu mibereho n’iterambere ry’ubukungu binyuze mu buyobozi bufite icyerekezo no mu bikorwa rusange.
Yashimye imbaraga RDF yakoresheje mu kuzana amahoro, umutekano, n’ituze mu Ntara ya Lobaye no mu Mujyi wa Mbaiki.
