World Economic Forum (WEF) yagaragaje urutonde rw’ibihugu icumi bifite ifaranga ryatakaje agaciro kurusha ibindi mu 2019, Venezuela iza ku isonga irusha Zimbabwe iyikurikiye inshuro zikubye hafi 2000. Ni ubushakashatsi uru rubuga rw’inama yiga ku bukungu bw’isi (WEF) rukesha Trading Economics bwagaragaje ko muri Mata 2019, ifaranga rya Venezuela (Bolivar) ryatakaje agaciro k’ibihumbi magana abiri na mirongo inani na bibiri na magana cyenda na mirongo irindwi na kabiri n’ibice mirongo inani ku ijana (282,972.80%). Impamvu yo gutakaza agaciro kw’ifaranga rya Venezuela ni umubare munini wahunze igihugu bitewe n’ibibazo bya politiki, bikaba bigaragara ko ubukungu iki gihugu cyari gifite mu 2013 bwagabanyutseho ½ ugereranyije n’iki gihe bijyanye n’umusaruro w’ibikomoka kuri peteroli wagabanyutse ku buryo bukabije. Ifaranga rya Venezuela ngo rizakomeza guta agaciro ku buryo rishobora no kugera ku rugero rwa miliyoni 10 ku % muri uyu mwaka. Zimbabwe iza ku mwanya wa kabiri, aho bigaragara ko agaciro k’ifaranga ryayo katakaye muri Werurwe ku rugero rw’175.66%. Zimbabwe yo yabitewe n’izamuka ry’ibiciro ry’ibicuruzwa bitandukanye birimo amavuta, imigati n’imiti. Urutonde muri rusange: 3. Sudani y’Epfo: Ifaranga ryayo (pound) ryatakaje agaciro ku rugero rwa 56.10% muri Werurwe 2019. 4. Argentine: Ifaranga ryayo (peso) ryatakaje agaciro ku rugero rwa 55.80% muri Kamena 2019. 5. Iran: Ifaranga ryayo (Rial) ryatakaje agaciro ku rugero rwa 50.40% muri Kamena 2019. 6. Sudan: Ifaranga ryayo (Pound) ryatakaje agaciro ku rugero rwa 47.80% muri Kamena 2019. 7. Liberia: Ifaranga ryayo (Dollar) ryatakaje agaciro ku rugero rwa 23.30 % muri Mata 2019. 8. Haïti: Ifaranga ryaho (Gourde) ryatakaje agaciro ku rugero rwa 18.00% muri Gicurasi 2019. 9. Sierra Leone: Ifaranga ryaho (Leone) ryatakaje agaciro ku rugero rwa 17.46% muri Werurwe 2019. 10. Angola: Ifaranga ryaho (Kwanza) ryatakaje agaciro ku rugero rwa 16.94% muri Kamena 2019.
