Umugaba Mukuru w’Ingabo z’u Rwanda, Gen. Mubarakh Muganga, kuri uyu wa Gatandatu yatanze isomo ku basirikare biga mu Ishuri Rikuru rya Gisirikare rya Kimoka muri Uganda.
Ni isomo ryibanze ku bijyanye n’uko Abanyafurika bakwiye kwishakamo ibisubizo by’ibibazo bahura na byo. Ni isomo by’umwihariko ryibanze ku butumwa ingabo z’u Rwanda zijyamo mu mahanga biciye mu masezerano y’ubufatanye u Rwanda rusinyana n’ibihugu bitandukanye.
Muri iri somo, hasuzumwe umusanzu u Rwanda rutanga mu gushakira ibisubizo ibibazo by’umutekano ibihugu by’inshuti n’abafatanyabikorwa barwo bo kuri uyu mugabane bihura na byo.
Gen. Mubarakh Muganga yashimangiye ko ibihugu bya Afurika bikwiye gukemura ibibazo by’umutekano byugarije uyu mugabane biciye mu kubyaza umusaruro amahirwe yo gusinyana amasezerano abyara inyungu hagati y’igihugu kimwe n’ikindi, cyangwa hagati y’igihugu kimwe n’ibindi byinshi hagamijwe kwigobotora ibibazo.
U Rwanda biciye mu masezerano y’ubufatanye rufitanye n’ibihugu bya Mozambique na Repubulika ya Centrafrique, rusanzwe rufite ingabo muri ibi bihugu rwoherejeyo mu butumwa bwo kuhagarura amahoro.
