Muungano wa Alliance Fleuve Congo (AFC), unaojumuisha kundi la waasi la M23 linalopinga serikali ya Kinshasa, umetangaza siku ya Ijumaa tarehe 9 Mei 2025 kwamba umepokea kundi la Wacongo kutoka diaspora waliowasili Goma kwa ajili ya kushiriki kwenye harakati za kupindua utawala wa Rais Félix Tshisekedi.
Kundi hilo lina watu wapatao 20, wakiwemo wanawake tisa, waliotoka katika nchi mbalimbali za Ulaya, Amerika, na Afrika. Wameamua kushiriki mafunzo ya kijeshi na kisiasa ili washiriki kikamilifu katika shughuli za kundi hilo, kwa mujibu wa uongozi wa AFC.
Walipokelewa rasmi na viongozi wakuu wa kundi hilo akiwemo Corneille Nangaa (mratibu wa kisiasa wa AFC), Bertrand Bisimwa, na Freddy Kaniki ambao ni majina maarufu ndani ya uongozi wa M23.
Hili ni kundi la pili kufika, baada ya kundi la awali la wanachama wapya pia waliotoka nje ya nchi na wanaendelea kuwahamasisha Wacongo wengine walioko diaspora kujiunga katika juhudi za kuleta mabadiliko ya kisiasa, usalama, na uongozi wa nchi yao.
Kwa mujibu wa waandaaji, wanachama hao wametoka katika nchi kama Ubelgiji, Ufaransa, Italia, Kanada, Marekani na Tanzania.
AFC-M23 imesema mpango huu unalenga “kuunganisha nguvu za Wacongo wote wanaotaka kujenga taifa lenye amani, usalama na uongozi mpya”, hasa katika kipindi hiki ambapo mashariki mwa DRC bado inakumbwa na hali ya ukosefu wa usalama.
Hata hivyo, mpango wa kuhusisha diaspora katika vita umekosolewa sana ndani ya nchi na kimataifa, kwa sababu unaweza kuchochea zaidi mgogoro wa muda mrefu katika eneo hilo.
Hii inajiri wakati ambapo mataifa kadhaa, yakiwemo Marekani, yanaendelea na juhudi za kidiplomasia kusuluhisha mzozo wa mashariki mwa Congo. DRC na Rwanda zinatarajiwa kusaini mikataba ya amani Washington, Marekani na Doha, Qatar.
