Tecquiero, mmoja wa watoto wenye kipaji kikubwa cha kuimba wanaolelewa na Shirika la Sherrie Silver Foundation, amekuwa akikumbana na ubaguzi na unyanyasaji kwenye mitandao ya kijamii kutokana na muundo wa meno yake usio wa kawaida kama watu wengi wanavyotarajia.
Kupitia video mbalimbali zinazopendwa sana, Tecquiero anaonyesha kipaji kikubwa kinachowavutia wengi. Hata hivyo, baada ya kuonekana kwenye baadhi ya nyimbo, alikumbwa na maoni ya kejeli kuhusu muonekano wa meno yake. Badala ya kumpa upendo na kumtia moyo, baadhi ya watu walichagua kumshambulia kwa maneno ya kuumiza.
Mwanzoni, uongozi wa Sherrie Silver Foundation ulifuta maoni hayo mara moja. Lakini baada ya kugundua kwamba tatizo linaendelea na linamuathiri kisaikolojia msichana huyo, Sherrie Silver mwenyewe, mwanzilishi wa shirika hilo, alichukua hatua kutafuta suluhisho la kudumu.
Kupitia akaunti yake ya X (zamani Twitter), Sherrie Silver aliandika:
“Mmoja wa wasanii watoto wanaopendwa zaidi wa Sherrie Silver Foundation ananyanyaswa kila mara kwenye mitandao ya kijamii kwa sababu ya meno yake, na tumechoka kufuta kila wakati maoni ya chuki 😞 Tunatafuta daktari wa meno atakayekuwa tayari kushirikiana nasi kumpatia suluhisho la kudumu. Asanteni sana.”
Ujumbe wa Sherrie ulipokelewa vizuri na watu wengi waliomwonyesha msichana huyo msaada na kuunga mkono mpango huo. Wengine walijitolea kusaidia kifedha au kumunganisha na madaktari bingwa wa meno.
Shirika la Sherrie Silver Foundation linafanya kazi nchini Rwanda na maeneo mengine ya Afrika, na linajulikana kwa kukuza vipaji vya watoto katika uimbaji na densi, huku likiwafundisha kujiamini na kuwa na maono ya maisha.
