Ubushinjacyaha ku Rwego Rwisumbuye rwa Huye bukurikiranye umugabo w’imyaka 44 ukekwaho gutwika umwana we w’umuhungu ufite imyaka 5 akoresheje umupanga ushyushye.
Icyaha cyabaye ku itariki ya 7 Kanama 2025 mu mudugudu wa Gihama, akagari ka Mbuye, Umurenge wa Kibirizi mu karere ka Nyanza mu rugo iwe mu gihe cya sa kumi z’amanywa.
Mu ibazwa rye nk’uko bitangazwa n’Ubushinjacyaha Bukuru, ukekwa yemeye ko yamutwitse ku kaboko, ku ntoki, mu kiganza no ku rutugu akoresheje umupanga ushyushye yari yabanje gushyira mu ziko amuhoye ko yakoze mu nkono y’ibishyimbo bari batetse; abisabira imbabazi.
Icyaha cyo guha ibihano biremereye umwana akurikiranyweho kiramutse kimuhamye yahanishwa igifungo kigera ku myaka 3 n’ihazabu y’ibihumbi 300.000, hashingiwe ku biteganywa n’ ingingo ya 28 y’Itegeko No 71/2018 ryo kuwa 31/08/2018 ryerekeye kurengera umwana.
