Nyuma y’ibitero bikomeye Amerika yagabye ku bikorwa bya nikeleyeli bya Iran, ubuyobozi bwa Tehran bwatangaje ku mugaragaro ko bugiye kwihorera, ibintu byongereye impungenge z’intambara ishobora gukwira mu karere no ku rwego mpuzamahanga.
Ibinyamakuru bitandukanye byatangaje ko Iran ifite amahitamo menshi yo kwihimura, arimo kwibasira ibirindiro by’ingabo za Amerika muri Iraki, Yorodaniya na Siriya, cyangwa gukoresha imitwe ishyigikiwe na yo nka Kata’ib Hezbollah yo muri Iraki ndetse n’Abahouthi bo muri Yemeni.
Igitero cyiswe Operation Midnight Hammer cyagabwe n’indege zidasanzwe za Amerika zo mu bwoko bwa B-2 Stealth Bombers zarekuye ibisasu byibasira ahantu harinzwe bikomeye, harimo sitasiyo ya nikeleyeli ya Fordo.
Nubwo Perezida Donald Trump yatangaje ko “Amerika yatsinze urugamba” nyuma y’iki gitero, Iran yavuze ko ibyabaye bidashobora kwirengagizwa. Minisitiri w’ububanyi n’amahanga wa Iran yavuze ko “igisubizo cy’iki gitero kizagira ingaruka z’ibihe byose.”
Mu gihe amahanga asaba ko haba ibiganiro no guhagarika imirwano, ibitangazamakuru bikomeye birimo The Guardian na The Times byatangaje ko Iran ishobora gukoresha intwaro z’ubukungu nko gufunga umuyoboro wa Hormuz, aho hafi 20% bya peteroli y’isi inyuzwa aho buri munsi.
Leta Zunze Ubumwe za Amerika ibinyujije ku Munyamabanga wa Leta Marco Rubio, yatangaje ko “kwihorera kuri Amerika byaba ari ikosa rikomeye Iran yakora mu mateka yayo.” Ibi byatanzwe nk’igitutu ku buyobozi bwa Tehran kugira ngo bihatire inzira y’ibiganiro aho kwiyambura amahirwe yo kuganira.
Ibihugu by’inshuti za Amerika birimo u Bwongereza byagaragaje impungenge ko ibitero by’iterabwoba bishobora kwiyongera ku butaka bwabyo, nyuma y’uko Amerika igabye ibi bitero mu buryo bwihuse.
Ibinyamakuru Daily Express na Daily Mail byatangaje ko hakomeje gukazwa ingamba z’umutekano, ndetse hakaba hari ubwoba ko ibikorwa bya Iran bishobora no kugera ku bihugu by’Uburayi.
