Mu izina ry’Umugaba Mukuru w’Ingabo za RDF, Brig. Gen. Ronald Rwivanga, Umuvugizi w’Ingabo kuri iki Cyumweru yagejeje ijambo ku bayobozi bakiri bato barenga 150 bahagarariye ibigo by’amashuri bitandukanye, barimo abanyeshuri bo muri za kaminuza 35 n’abayobozi ba za kaminuza, bateraniye i Kigali mu giterane kiswe ‘Young Leaders’ Breakfast Network’.
Iyi nama yateguwe n’Ihuriro ry’Ubuyobozi bw’Urubyiruko muri Afurika (AYLF) ku bufatanye na Cornerstone Development Africa, ku nsanganyamatsiko igira iti: “Leading with Values: A Heroic Compass to Leadership Effectiveness and Positive Impact.” ugenekereje mu Kinyarwanda ni nko Kuyoborana indangagaciro nk’ibigena imikorere myiza y’ubuyobozi n’ingaruka nziza.
Iyi nama yabaye urubuga rukomeye rwo gushishikariza urubyiruko kugana ku buyobozi bushingiye ku bunyangamugayo, gukunda igihugu na serivisi.
Mu ijambo rye, Brig Gen Rwivanga yerekanye urugendo rutangaje rw’u Rwanda n’indangagaciro zayoboye iterambere ryarwo.
Ati: “Ubuyobozi ntabwo bushingiye ku mwanya cyangwa ku butegetsi, ahubwo ni ubutwari bwo gushikama ku byiza no gukorera hamwe twicishije bugufi”.
Yashimangiye ko Ingabo z’u Rwanda zikomeje kwiyemeza kugendera ku buyobozi bugendera ku ndangagaciro mu nshingano zazo mu bikorwa zikora mu gihugu, harimo guhangana n’ibiza, mu butumwa bwo kubungabunga amahoro, ndetse no kongera kwiyubaka nyuma ya jenoside.
Yavuze ko intwari nyazo ari abakorana ikinyabupfura, ubumwe, no kubaha ikiremwamuntu.
Brig. Gen Rwivanga yahamagariye urubyiruko kutazayoboza amarangamutima yarwo, ahubwo rukazayoboresha indangagaciro zizubaka u Rwanda rukomeye na Afurika nziza.
