Tumaini la kurejesha uhusiano mwema kati ya Rwanda na Burundi limepungua tena baada ya Rais Evariste Ndayishimiye wa Burundi kumteua Waziri mpya wa Mambo ya Nje, Dkt. Edouard Bizimana, ambaye wengi wanamtaja kuwa mtu wa mgawanyiko na chuki za kikabila — hali ambayo inazidi kuonekana kwa baadhi ya viongozi wa Ukanda wa Maziwa Makuu.
Tarehe 5 Agosti 2025, Rais Ndayishimiye alifanya mabadiliko serikalini, akipunguza wizara kutoka 15 hadi 13 na kumteua Dkt. Bizimana kuwa Waziri wa Mambo ya Nje, siku moja tu baada ya kumteua Waziri Mkuu mpya, Nestor Ntahontuye, kumrithi Gervais Ndirakobuca aliyehamia Seneti.
Uteuzi huo ulipokelewa kwa furaha na baadhi ya viongozi wa juu wa Burundi, akiwemo mshauri wa Rais, Willy Nyamitwe, aliyemtakia kila la heri katika kutetea maslahi ya Burundi kimataifa. Hata hivyo, baadhi ya Warundi na Wanyarwanda wanaomfahamu wanauona uteuzi huu kuwa pigo kwa diplomasia ya kikanda.
Mwanaharakati wa haki za binadamu kutoka Burundi, Pacifique Nininahazwe, mkosoaji wa muda mrefu wa serikali ya CNDD-FDD, aliandika kwenye X:
“Tulikuwa na Shingiro, Waziri aliyekanusha mauaji ya kimbari ya Watutsi nchini Rwanda. Sasa tuna Édouard Bizimana, mtu wa mgawanyiko mkubwa. Anaichukia Rwanda. Je, ataweza kusaidia kupunguza mizozo ukanda huu?”
Ujumbe huo uliambatana na picha za maneno ya zamani ya Bizimana kwenye X yaliyojaa chuki, ikiwemo:
“Inawezekana vipi kwa Nduhungirehe, Muhutu kutoka Rwanda, kuwa msemaji wa Watutsi wa Congo…?”
Aliwahi pia kusema kuwa Wanyarwanda 796 waliorejea kutoka misitu ya Congo kupitia Rubavu, wengi wao wangekufa au hatma yao haijulikani.
Wanyarwanda wengine pia walitoa maoni yao kuhusu uteuzi huo. Balozi wa Rwanda nchini Indonesia, Sheikh Abdul Karim Harerimana, aliandika:
“Edouard Bizimana ni mpenda misimamo mikali anayejulikana duniani. Ngojeni tu muone.”
Christa Mongi Muhangi, mzaliwa wa Ngara, Tanzania, aliandika:
“Kumteua Edouard Bizimana, aliyejaa chuki za kikabila, ni tusi kwa diplomasia na amani ya ukanda huu. Uteuzi huu unaonesha kuwa CNDD-FDD haitaki maridhiano wala usalama, bali inaendeleza fikra za sumu. Burundi inaelekea ukingoni.”
Dkt. Edouard Bizimana ni Nani?
Dkt. Edouard Bizimana alizaliwa Burundi mnamo tarehe 10 Februari 1968 (miaka 57), ameoa na ana watoto wanne.
Ana shahada ya Bachelor ya Fasihi ya Kiingereza ya Kisasa kutoka Chuo Kikuu cha Yaoundé, Cameroon (1998), na Shahada ya Uzamili na PhD ya Mahusiano ya Kimataifa kutoka IRIC, Cameroon.
Tasnifu yake ya PhD ilikuwa kuhusu:
“Migogoro ya Kivita na Uhifadhi wa Mazingira katika Ukanda wa Maziwa Makuu.”
Aliwahi kufanya mafunzo ya kazi katika Wizara ya Mambo ya Nje ya Cameroon, Chama cha Riadha cha Cameroon, na Taasisi ya Masomo ya Kidiplomasia mjini Cairo.
Mwaka 2004, alijiunga na Wizara ya Mambo ya Nje ya Burundi kama mshauri wa ushirikiano na Ulaya na Amerika Kaskazini. Baadaye alihudumu kama Naibu Mkuu wa Protokali katika ofisi ya Makamu wa Pili wa Rais (2006), na mshauri wa kwanza katika Ubalozi wa Burundi mjini Washington, Marekani (2007–2010).
Mwaka 2012, alihusika na masuala ya mashirika ya kimataifa na kikanda, na baadaye akateuliwa kuwa Katibu Mkuu wa Kudumu wa jukwaa la vyama vya siasa (FDP).
Tangu Juni 2012, amekuwa Balozi wa Burundi nchini Ujerumani, akichangia kuimarisha ushirikiano kati ya Burundi na nchi mbalimbali za Ulaya.
Dkt. Bizimana anachukua nafasi ya Balozi Albert Shingiro, aliyekuwa mstari wa mbele kuimarisha tena uhusiano wa Burundi na majirani zake baada ya miaka ya kutengwa kimataifa.
