Ubushinjacyaha Bukuru bwa Gisirikare muri Repubulika Iharanira Demokarasi ya Congo kuva mu kwezi gushize buri gukora iperereza ku basirikare bo ku rwego rwa ba Jenerali bo mu ngabo za kiriya gihugu, bakekwaho kugira uruhare mu gutuma ingabo za RDC zitsindirwa mu ntambara yo mu burasirazuba bw’iki gihugu.
Abari gukorwaho iperereza ni abari bayoboye igisirikare, kuva ku mugaba Mukuru w’Ingabo kugeza ku bayobozi b’imitwe itandukanye.
Aba bakekwaho kugira uruhare mu gutuma ingabo za FARDC zitakaza ibice bitandukanye byo mu burasirazuba bwa RDC zambuwe n’inyeshyamba zo mu mutwe wa M23, by’umwihariko nk’Umujyi wa Bunagana, uwa Goma, Bukavu ndetse n’ibindi bice by’ingenzi.
Iperereza Ubushinjacyaha bwa Gisirikare muri RDC buri gukora kuva mu mpera za Nyakanga, rigamije kumenya intandaro yatumye ingabo za leta zitsindwa, ababigizemo uruhare ndetse n’ingamba zafatwa kugira ngo zibashe kwitwara neza mu ntambara ikomeje mu burasirazuba bw’igihugu.
Abafunzwe barangajwe imbere na Gen. Christian Tshiwewe Songesa wahoze ari Umugaba Mukuru w’Ingabo za RDC, na Lt. Gen. Franck Ntumba wahoze akuriye ibikorwa bya gisirikare mu biro bya Perezida Félix Antoine Tshisekedi.
Aba bombi mu mezi abiri ashize ubwo batabwaga muri yombi, byavuzwe ko bari bamaze igihe bategura umugambi wo guhirika ku butegetsi Tshisekedi.
Abandi bafunzwe ni ba Lt. Gen Padiri Bulenda David ukuriye inkeragutabara muri RDC, Fall Sikabwe wahoze akuriye ibikorwa bya gisirikare muri Kivu y’Amajyaruguru, Marcel Mbangu wahoze ayobora akarere ka gatatu ka gisirikare, Kostant Ndima Kongba wahoze ari Guverineri wa gisirikare wa Kivu y’Amajyaruguru, Jacques Ychaligonza usanzwe ari Umugaba Mukuru w’Ingabo wungirije ushinzwe ibikorwa n’ubutasi, Rwibasira Obed ukuriye amashuri ya gisirikare muri RDC na Philemon Yav wahoze ayobora akarere ka gatatu ka gisirikare.
Barimo kandi ba Général-Major: Bombele Camille, Sylvain Ekenge usanzwe ari umuvugizi wa FARDC, Jerome Chico Tshitambwe wahoze ari Umugaba Mukuru w’Ingabo wungirije ushinzwe ibikorwa n’ubutasi, Christian Ndaywel wahoze akuriye ubutasi bwa gisirikare, Bitangalo Clément, Ngama Lebe Franck, Yav Ngola Robert, Mpezo Bruno, Jean Roger Makombo, Kabi Ephraim ukuriye abasirikare barinda Tshisekedi, Déogratias Lukwebo, Danga Bruno na Jean Claude Singa.
Ba Général de Brigade bari gukorwaho iperereza bo ni Moyo Rabbi Richard, Ehoza Ukati André na Vice-Amiral Kuyandi Albert uyobora ingabo za RDC zirwanira mu mazi.
