Guverinoma ya Repubulika yunze ubumwe ya Tanzaniya yahakanye ibivugwa na HRW ko igitutu cya politiki kubatavuga rumwe na leta cyiyongereye muri iki gihugu mu gihe kigana ku matora rusange ateganijwe ku ya 29 Ukwakira 2025.
Mu gusubiza raporo yatanzwe na (HRW), umuvugizi wa Guverinoma Gerson Msigwa, yavuze ko iyi raporo atari yo kandi iyobya rubanda. Msigwa kandi yamaganye ibirego bya raporo zivuga ko hakomeje kubaho ishimutwa ry’abaturage mu gihugu, mu itangazo rigira riti: “Kuvuga ko ubwisanzure bwa politiki bugabanuka mu gihe cy’amatora rusange yo mu 2025 ntabwo ari ukuri.”
Iri tangazo ryongeyeho riti: “Itegeko Nshinga ry’igihugu riha uburenganzira bwo kubaho, umutekano n’ubwisanzure kuri buri munyatanzaniya.”
Uyu muvugizi yanenze HRW gutanga raporo nk’izi zibogamye ndetse ntihe guverinoma amahirwe yo kugira icyo izivuzeho mbere yo gusohoka, Msigwa yavuze ko guverinoma ya Tanzaniya yiteguye igihe icyo ari cyo cyose gufatanya n’ikigo icyo ari cyo cyose gishaka amakuru nyayo.
Raporo ya HRW ivuga ko abayobozi ba Tanzaniya bahagaritse abatavuga rumwe n’ubutegetsi n’abanenga ishyaka riri ku butegetsi, gucecekesha itangazamakuru, ndetse no kwinjirira ubwigenge bwa komisiyo y’amatora.
Nomathamsanqa Masiko-Mpaka, umushakashatsi muri Afurika muri Human Rights Watch, yagize ati: “Abayobozi bakeneye kwirinda kubangamira abatavuga rumwe n’ubutegetsi n’itangazamakuru”
Raporo kandi yahamagariye guverinoma ya Tanzaniya gufata ingamba zihutirwa zo kurengera ubwisanzure bw’amatora rusange aho HRW ivuga ko iri mu kaga gakomeye.
Tanzaniya yavuze ko yiyemeje guharanira ko uburenganzira bwa muntu, demokarasi, imiyoborere myiza, no kugendera ku mategeko byubahirizwa mbere y’amatora rusange ya 2025 na nyuma yayo.
