Abana 50 mu bana 315 bashimuswe n’abantu bitwaje imbunda bo mu ishuri ry’Abagatolika ryo muri Leta ya Niger baratorotse. Igipolisi cyaho kivuga ko abantu bitwaje imbunda bateye ishuri rya St Mary ahagana mu ma saa munani za mugitondo (01:00 GMT) ku wa Gatanu ushize.
Ishyirahamwe ry’Abakirisitu rikurikiranira hafi iki kibazo rivuga ko, abanyeshuri bashoboye gutoroka hagati yo kuwa Gatanu no kuwa Gatandatu mu byo bavuga ko ari ubutwari no gusa nko kwiyahura muri icyo gikorwa cyo gutoroka abashimusi.
Ishyirahamwe ry’Abakirisitu bo muri Nigeria rikomeza rivuga ko bahuye n’imiryango yabo. Igikorwa gikomeye cyo gushakisha no gutabara kiyobowe n’abasirikare kirimo gukorwa ku bana 265 basigaye n’abarimu 12 bafashwe bugwate.
Abategetsi bo muri leta nyinshi zigize Nigeria bategetse amashuri gufunga nyuma y’ishimutwa ry’abantu benshi muri Leta ya Niger ndetse n’irindi shimuta rito kuri uyu wa Mbere muri Leta ya Kebbi ubwo abanyeshuri 25 bashimutirwaga ku ishuri bacumbitsemo.
Mu rwego rwo guhangana n’iri shimuta ry’abantu benshi, Perezida wa Nigeria, Bola Tinubu, yategetse ko hinjizwa mu kazi abandi bapolisi 30.000 nk’uko iyi nkuru dukesha BBC ivuga.
Ku rundi ruhande, abantu 38 bashimutiwe mu rusengero muri Leta ya Kwara mu cyumweru gishize bararekuwe kuri iki Cyumweru, itariki 23 Ugushyingo nk’uko guverineri wa leta yabitangaje.
Abantu babiri kandi baguye mu gitero cyagabwe ku rusengero rwa Christ Apostolic Church muri Eruku.
Hatanzwe amabwiriza ku mashuri menshi yo gufunga muri leta za Kebbi, Niger, Katsina, Yobe na Kwara.
