Perezida Paul Kagame yagaragaje ibyishimo bikomeye, nyuma y’uko Arsenal yihebeye itsinze Bayern Münich ibitego 3-1, mu mukino w’amatsinda ya UEFA Champions League.
The Gunners yari yakiriye Bavaria, mu mukino w’ishiraniro wabereye kuri Emirates Stadium.
Nyuma yawo Perezida Paul Kagame uzwiho kuba umukunzi w’akadasohoka w’iriya kipe y’i Londres, yagaragaje ko yatewe ishema na yo ku bw’iriya ntsinzi.
Yabanje kwandika ku rubuga rwe rwa X ati: “Arsenal”, mbere yo kungamo ati: “Arsenal twese yaduteye ishema. Mwishyuke.”
Ikipe y’umutoza Mikel Arteta yafunguye amazamu ku munota wa 22 w’umukino ibifashijwemo na myugariro Julian Timber. Ni ku mupira wari uturutse kuri koruneri yari itewe na Bukayo Saka, mbere y’uko uriya myugariro w’Umuholandi awutereka mu izamu n’umutwe.
Bayern Münich yishyuye iki gitego nyuma y’iminota 10, ku mupira muremure Joshua Kimmich yateye ugasanga Serge Gnabry wahise awuhindura imbere y’izamu, mbere Lennart Karl yishyura igitego.
Amakipe yombi yagiye kuruhuka anganya igitego 1-1.
Byasabye umunota wa 69 w’umukino ngo Arsenal yari yatangiranye imbaraga nyinshi igice cya kabiri yongere kuyobora umukino, ku mupira Riccardo Calafiori yazamukanye akawuhindura imbere y’izamu, mbere y’uko Noni Madueke atsinda igitego cya kabiri.
Ni igitego cyaje gikurikira uburyo bukomeye abarimo Mikel Merino, Saka na Declan Rice bari bagiye bahusha.
Iyi kipe yashimangiye intsinzi yayo ku munota wa 77 ubwo Gabriel Martinelli yacomekerwaga umupira mwiza na Eberechi Eze agatsinda igitego cya gatatu.
Gutsinda Bayern Münich byatumye Arsenal isigara ari yo kipe yonyine itaratakaza umukino n’umwe muri UEFA Champions League y’uyu mwaka, dore ko iyoboye urutonde rw’amakipe yose uko ari 36 n’amanota 15 kuri 15.
