Ubutegetsi bw’u Burundi ku wa Mbere tariki ya 8 Ukuboza, bwasabye Imbonerakure (umutwe witwara gisirikare w’urubyiruko rwo mu ishyaka CNDD-FDD) kwegera umupaka w’u Rwanda, bunategura abantu bo kuza guhungabanya umutekano w’igihugu.
Ni icyemezo ubutegetsi bwa Gitega bwafashe nyuma y’uko kuva mu cyumweru gishize bwikunditse u Rwanda bushinja kurasa ibisasu ahitwa mu Rugombo mu yahoze ari intara ya Cibitoke.
Icyemezo cyo kohereza Imbonerakure ku mipaka cyafatiwe mu nama yahuje abayobozi b’Imbonerakure mu ntara ya Butanyerera, by’umwihariko muri Komine za Kirundo na Busoni zihana imbibi n’u Rwanda.
Amakuru BWIZA yamenye ni uko iyo nama yabaye saa munani z’igicuku, iyoborwa n’uwitwa Nzambimana Jean Claude ukuriye Imbonerakure mu ntara nshya ya Butanyerera. Mu bayitabiriye hanarimo Umuyobozi wa Polisi mu Kirundo.
BWIZA kandi yamenye ko mu byavugiwe muri iyo nama harimo ko babwiye imbonerakure kwitegura kujya ku mipaka y’u Rwanda yose.
Kugira ngo haboneke Imbonerakure zifuzwa, BWIZA yamenye ko abenshi mu rubyiruko rwo muri CNDD-FDD batangiye kwigishwa ku bwinshi gukoresha imbunda ndetse n’intwaro gakondo.
Biteganyijwe ko izo Mbonerakure zizafatanya n’Ingabo z’u Burundi kurinda imipaka ihuza u Burundi n’u Rwanda.
Andi makuru kandi avuga ko u Burundi bwamaze gutegura mu ibanga kohereza bamwe mu bantu babwo mu Rwanda, gukurikirana amakuru y’impunzi zo muri kiriya gihugu ndetse no guteza umutekano muke.
Biteganyijwe ko kuri uyu wa Kabiri ari bwo Imbonerakure zihabwa ibikoresho by’akazi n’amategeko, mbere yo kujya mu kazi.
One Response
Ibi bintu aba DD bashaka gukora vyoba vyiza babiretse kk ntibizobahira. Kuva kera imigambi yabo ni kwica gusa abantu badasangiye ubwoko, nibaza ko gushamirana n’Urwanda atanyungu n’imwe uBurundi bubifisemwo. Nohanura urwaruka rw’imbonerakure kwima amatwi abanyapolitike ataneza baruronderera kk imyaka iheze batwara igihugu ataciza na kimwe barakorera urwaruka. CNDD FDD nitanguza intambara abarundi tuzoyirwanya kandi tuzoba dushize akadomo ku ntwaro mbi.