Igisirikare cya Repubulika Iharanira Demokarasi ya Congo (FARDC), cyashinje abantu ba hafi ya Perezida Félix Antoine Tshisekedi kuba ari bo bari inyuma y’umutwe witwaje intwaro wa Mobondo.
Mobondo ni umutwe byatangiye uteza amakimbirane ashingiye ku butaka muri Teritwari ya Kwamouth mu ntara ya Mai-Ndombe, gusa kuri ubu wamaze guhinduka umutwe w’inyeshyamba ndetse wagura ibikorwa byawo, ku buryo wamaze no gusatira Umujyi wa Kinshasa.
FARDC biciye muri Captain Anthony Mwalushay uvugira ibikorwa byayo bya gisirikare bizwi nka ‘Ngemba’ ikorera mu burengerazuba bwa RDC, yatangaje ko abantu ba hafi ya Perezida Tshisekedi ari bo bari inyuma y’ibikorwa by’uriya mutwe.
Uyu Ofisiye ku Cyumweru ubwo yaganiriraga n’itangazamakuru mu mujyi wa Kikwit yagize ati: “Dufite amakuru yerekeye kuvugana hagati y’umitwe yitwaje intwaro yo mu burasirazuba bwa RDC. Ku bijyanye n’iyi mitwe ya Mobondo, ikibi ni uko abenshi mu bari inyuma ya Mobondo ari abegereye Perezida wa Repubulika. Ku manywa bahinduka intama, nijoro bakaba ari bo baha amabwiriza Mobondo.”
Captain Anthony Mwalushay yunzemo ko abarwanyi b’uriya mutwe bafashwe mpiri na FARDC bagiye bavuga bamwe mu bantu ba hafi ya Perezida bakorana na bo.
Yunzemo ati: “Inzego zacu ziri gukora iperereza mbere y’uko amakuru ashyirwa ku karubanda. Niba abo ku ruhande rwa Kinshasa bigaragaza neza ari bo bari inyuma y’umutwe wa Mobondo, twe nk’ingabo tuzakora akazi kacu dukoresheje intwaro.”
Uyu Ofisiye yashimangiye ko nta buryo na bumwe abari inyuma ya ziriya nyeshyamba bazakoresha ngo batume FARDC ihagarika ibitero imaze igihe izigabaho, kugeza igihe izicira umurwanyi wa nyuma wa Mobondo.
