Ikipe ya Rayon Sports kuri uyu wa Mbere tariki ya 5 Mutarama yerekanye abakinnyi babiri b’abanyamahanga yamaze gusinyisha, ngo bazayifashe mu gice cya kabiri cya shampiyona.
Iyi kipe ibinyujije ku rubuga rwayo rwa X, yemeje ko yamaze gusinyisha umunya-Bénin Joachim VIGNINOU.
Iyi kipe yavuze ko uyu mukinnyi w’imyaka 23 y’amavuko ari rutahizamu usanzwe akinisha akaguru k’ibumoso, akaba apima ibiro 74 n’uburebure bwa santimetero 183.
Umukinnyi wa kabiri ni myugariro Ramazani Tshimanga Tshilembi. Uyu myugariro ukomoka muri Repubulika Iharanira Demokarasi ya Congo na we afite imyaka 23 y’amavuko, akaba areshya na metero ebyiri ziburaho sentimetero eshanu.
Rayon Sports kandi yateguje ko iri butangaze umukinnyi wa gatatu ukina inyuma ku ruhande rw’ibumoso.
Amakuru avuga ko uyu ari uwitwa Ben Aziz Dao, umunya-Burkina Faso ukina inyuma ku ruhande rw’ibumoso.
Aba banyamahanga kandi uko ari batatu bariyongera ku munyezamu Kwizera Olivier iyi kipe yasinyishije mu mpera z’icyumweru gishize, umunye-Congo Yannick Bangala na Faustin Likau Pizzalo KITOKO na we w’umunye-Congo.
