Uwigeze kuba umuvugizi w’ishyaka rya FNL Parpehutu, ubu akaba ayoboye iryitwa FNL Iragi rya Gahutu Remy yiyamye abarwanya ubutegetsi bwa Perezida Nkurunziza ko nta kindi bagamije uretse kwimika ubwami bw’Abahima mu Burundi. Akaba asaba ko abashaka ko Nkurunziza ava ku butegetsi bakwiye kubanza gukurikirana mu butabera Pierre Buyoya na Sylvestre Ntibantunganya bombi bahoze bayobora u Burundi.
Mu ijambo ryumvikanye ku maradiyo atandukanye akorera mu gihugu cy’u Burundi Pasteur Habimana yagarutse ku mateka yaranze u Burundi uburyo abategetsi bagiye bajyaho babanje kumena amaraso y’abaturage no guhirika abo basanze ku butegetsi.
Agaruka kuri Ntibantunganya nawe yamushinje kuba yaragiye ku butegetsi amennye amaraso, ndetse no kuba yiruka inyuma kubigeze kumutera amazirantoki ubwo yari mu ntara ya Gitega mu 1996.
Pasteur Habimana avuga ko aba ashyigikiye aribo bamukoreye aya mahano yo kumutera amazirantoki ubwo yari ku butegetsi akaba ahamya ko batamukunze ahubwo ari ukumugira igikoresho ku nyungu zabo.
Kuri Pierre Buyoya, avuga ko yakoze amahano menshi amena amaraso y’inzirakarengane ubwo yari ku butegetsi. Pasteur Habimana asaba ko aba bagabo bombi bakurikiranwa n’ubutabera bakaryozwa ibyo bakoze.
Pasteur Habimana niwe wabaye umuvugizi wa mbere w’ishyaka FNL Parpehutu ishyaka kuri ubu riyobowe Agathon Rwasa.
Pasteur yavuye muri iri shyaka mu 2005 nyuma y’amatora ya 2010 nibwo yashinze ishyaka FNL Iragi rya Gahutu Remy. Abarwanya ubutegetsi bwa Perezida Nkurunziza bavuga ko aba mu ishyaka riri ku butegetsi rya CNDD — FDD aho akoreshwa n’iri shyaka yitwa ko atavuga rumwe n’ubutegetsi nyamara ari umurwanashyaka waryo.
Kanda hano ujye ubona amakuru yihuse kandi kugihe kuri Facebook no kuri twitter
Alphonse Munyankindi / Bwiza.com
