Minisitiri w’ububanyi n’amahanga wa Repubulika ya demukarasi ya Congo (RDC), Christophe Lutundula, aremeza ko ingabo za Angola zitegerejwe mu burasirazuba bw’igihugu cyabo zitazarwana.
Ibiro bya Perezida wa Angola usanzwe ari umuhuza w’amahoro wemejwe n’umuryango wa Afurika yunze ubumwe (AU) biherutse kwemeza ko iki gihugu kigiye kohereza ingabo mu burasirazuba bwa RDC.
Ibi biro byasobanuye ko kohereza izi ngabo biri mu rwego rwo gushyira mu bikorwa icyemezo gisaba umutwe witwaje intwaro wa M23 kurambika intwaro no kurekura ibice yafashe.
Hashingiwe ku byemezo byafatiwe mu nama y’abakuru b’ibihugu byo mu muryango wa Afurika y’iburasirazuba, ingabo byohereje mu mutwe uzwi nka EACRF ni zo zahawe uburenganzira bwo kugenzura ibice M23 izarekura.
Kuri uyu wa 13 Werurwe 2023, Minisitiri Lutundula hamwe na mugenzi we ushinzwe itangazamakuru n’itumanaho, Patrick Muyaya, bagiranye ikiganiro n’abanyamakuru. Yabajijwe niba ingabo za Angola zitazinjira mu ntambara iri kubera muri RDC, asubiza ko atari ko biri.
Minisitiri Lutundula yagize ati: “Ingabo za Angola ntabwo zizaza ngo zirwane. Mbese ntabwo ari manda yo kugaba ibitero. Ni ngombwa ko ibintu bijya mu mucyo. Ni ngombwa kwirinda kuyobya abantu.”
Perezida wa Angola ategereje uruhushya rw’Inteko ishinga amategeko y’igihugu kugira ngo yohereze izi ngabo muri RDC.
