Minisitiri w’ibikorwaremezo, Dr Gasore Jimmy, yatangaje ko bitandukanye n’ibisanzwe, icyerekezo kimwe kitazongera gukoreramo ikigo kimwe gitwara abagenzi mu buryo bwa rusange.
Ibi yabitangarije kuri televiziyo y’igihugu kuri uyu wa 28 Ugushyingo 2023, ubwo yasobanuraga amabwiriza mashya yasohotse arebana n’uburyo bwo gutwara abagenzi, yitezweho gukemura bimwe mu bibazo bahura na byo birimo gutegereza imodoka igihe kinini.
Ikibazo cy’imirongo minini y’abategereza imodoka muri za gare, by’umwihariko mu mujyi wa Kigali kimaze igihe kinini kivugwa, ndetse urwego rw’igihugu rugenzura imikorere, RURA, na Minisiteri y’ibikorwaremezo, byakibajijweho mu nteko ishinga amategeko.
Umunyamabanga Uhoraho muri iyi Minisiteri, Abimana Fidele, tariki ya 21 Nzeri 2023 yahaye abadepite bagize komisiyo ishinzwe kugenzura imikoreshereze y’imari n’umutungo by’igihugu, PAC, isezerano ry’uko muri uku kwezi k’Ugushyingo 2023 hari bisi nshya zizaza, zikaba zitezweho kugabanya igihe abagenzi bategereza imodoka.
Abimana yagize ati: “Iza mbere tariki ya 18/10 ni bwo zizagera mu bwato. Ni yo mpamvu twizera ko kuva mu bwato kugera aha, mu mpera z’ukwezi kwa 11 izo bisi zizaba zaje. Bisi 100 kuzikora bitwara umwanya, zagombaga guhita ziza ariko hajemo n’icyo gihe cyo kuzikora.” Nk’uko yabisezeranyije abadepite, izi bisi za mbere zageze i Kigali mu cyumweru gishize.
Mu bibazo abadepite ndetse n’abaturage bagaragaje muri serivisi yo gutwara abagenzi mu buryo bwa rusange, bituma habaho gutegereza imodoka umwanya munini, harimo kuba hari ibyerekezo byo mu mujyi wa Kigali bikoreramo ikigo kimwe. Minisitiri Gasore yavuze ko iki cyakosowe, hakaba hagiye kubaho ihatana (competition).
Minisitiri Gasore yagize ati: “Bitandukanye n’uko twakoraga, ntabwo icyerekezo kimwe kizajya gikorwamo umuntu umwe. Tuzajya dushyiramo abantu babiri cyangwa barenze umwe kugira ngo habeho competition. Umuntu akore yumva ko natanga serivisi mbi, hari abari butange serivisi nziza, bityo bimwongerere ubushake bwo gukora neza kurushaho.”
Izi ngamba zizatangira gushyirwa mu bikorwa tariki ya 15 Ukuboza 2023.
