Abagize inama itaguye y’umutekano mu karere ka Rubavu baganirijwe ku cyakorwa ngo abakora ubucuruzi bucirirtse bwambukiranya umupaka ntibakomeza kugorwa n’amategeko atubahirizwa akabahindukiraho buri munsi (gufunga umupaka saa cyenda z’amanywa), hirengagijwe amategeko y’Umuryango w’ibiyaga bigari CPGL, ibyatumye komisiyo y’ubutabera n’amahoro muri Diyosezi ya Nyundo (CDJP/Nyundo) ihagurukira iki kibazo.
Ibi byagarutsweho kuri uyu wa gatatu, tariki 04 Ukuboza 2024 mu biganiro byahuje Umuryango utegamiye kuri Leta ukora ibikorwa bishingiye ku kubaka amahoro (La Benevolencia) na komisiyo y’ubutabera n’amahoro muri Diyosezi ya Nyundo (CDJP/Nyundo) mu kurushaho kugarura amahoro mu biyaga bigari.
Amakimbirane n’umutekano wa Politiki hagati y’ibihugu ni kimwe mubyaganiriweho ngo gikorerwe ubuvugizi, abakora ubucuruzi buciriritse barusheho kwishyira bakizana.
Padiri Rutakisha Jean Paul, umuhuzabikorwa wa komisiyo y’ubutabera n’amahoro muri Diyosezi ya Nyundo (CDJP/Nyundo) avuga ko nyuma yo kubona urujya n’uruza rw’abantu n’ibintu mu karere k’ibiyaga bigari bibangamiwe n’imihindagurike n’amategeko bahisemo guhaguruka nabo bagakora ubuvugizi bafatanyije na La benevolencia.
Ati “Urujya n’uruza rw’abantu n’ibintu byabo twasanze bibangamiwe no guhindura no kutubahiriza amtegeko bya hato na hato, amasaha yo gufunga umupaka aracyari inzitizi kuko bigira ingaruka ku bicuruzwa kandi ibi byose biba byica amategeko y’umuryango w’ibiyaga bigari CPGL yo kuba abaturage bagomba kwishyira bakizana haba mu guhahirana no kugendererana.”
Akomeza avuga ko uru rugendo rutazagarukira mu karere ka Rubavu, kuko bazakomereza no mu karere ka Rusizi kugira ngo ubucuruzi bwambukiranya umupaka buzahurwe kandi buteze imbere ababukora, aho bazakora ubuvugizi kugera ku rwego rukuru rw’Igihugu.
King Ngoma, Umukozi w’umuryango La benevolencia mu karere k’ibiyaga bigari ahamya ko mu bihe bitandukanye bagiye babona ibibazo byugarije urujya n’uruza mu bucuruzi bwambukiranya umupaka biterwa n’ubushyamirane bwa politiki, aho bimwe mu bihugu bihita bishyiraho ingamba zikakaye byirengagije ingaruka zizagira ku buhahirane bugize ubuzima bw’abaturage.
Akomeza avuga ko ibi byemezo by’ibihugu akenshi bifatwa hirengegijwe amasezerano aba yaragiye asinywa mu rwego rw’akarere (CPGL), aho usanga bimwe bifunga imipaka ibindi bigahindura amasaha abantu bambukiraho, aho bifuza ko ibi byose byakoroshywa kandi ko bazakomeza kubikorera ubuvugizi.
Umuyobozi w’akarere ka Rubavu, Mulindwa Prosper yamaganiye kure inkuru yatangajwe mu kinyamakuru cya Radiookapi.
Mu kiganiro n’abanyamakuru Umuyobozi w’akarere ka Rubavu, Mulindwa Prosper cyabaye mu gitondo cyo kuri uyu wa gatatu, tariki yavuze yatangajwe cyane n’ibyatangajwe n’ikinyamakuru cya Radiookapi cyo kuba yarakumiriye Ibicuruzwa by’abacuruzi bato b’Abanyekongo bagera ku 10,000, bibumbiye mu makoperative 47.
Aho iki gitangazamakuru cyatangaje ko byafatiwe mu Rwanda nyuma y’icyemezo cy’umuyobozi w’Akarere ka Rubavu cyo guhagarika kwambutsa ibicuruzwa binyuze ku mupaka muto wa Birere hakoreshejwe amakamyo. Iki cyemezo cyemerera gusa moto zifite ibyuma bitatu, zikunze gukoreshwa n’abacuruzi b’Abanyarwanda, kwambuka zijya i Goma, bikaba byahombeje cyane Abanyekongo, nk’uko abacuruzi b’abagore b’Abanyekongo babivuga.
Mulindwa yagize ati “Byadutunguye cyane, gusa twagihuje n’icyo tumaze iminsi tugejejweho, aho hari abanyarwanda bake bigize abakongomani bakifuza ko inyungu zose zijya mu maboko yabo, bahombya abaturage bacu, aho bakoze ishyirahamwe ryabo batatumwe na Leta bagirana amasezerano n’irindi tsinda ry’abanyarwanda bake cyane ritatumwe na Leta, aho bagenaga uko ibicuruzwa byinjira (mu modoka) bahera ku gicuruzwa cy’inyanya gikenewe cyane i Goma, bakurikizaho inkoko bari batangiye kwinjizamo imboga, bashaka kwiharira isoko bonyine.”
Akomeza avuga ko iki kibazo bakibonye nk’ikimaze kubangamira abacuruzi bo mu Rwanda, aho abatarabaga mu gatsiko kabo atabashaga kugira icyo binjiza yaba abakoreza amagare y’abafite ubumuga na moto za Rifani zitari zikibasha kujyayo, ndetse aka gatsiko katangiye kujya gasoresha abatakanyujijeho ibicuruzwa bakabemerera cyangwa rimwe na rimwe ntibabemerere, rimwe na rimwe bagacunga amasaha bagahenda ababajyaniye ibicuruzwa.
Mulindwa yahamije ko abatishimiye ingamba bafashe aribo batangiye gutabaza bahimba ikinyoma, aho ibindi bicuruzwa batagenzuraga byinjiragayo nta nkomyi, ndetse uyu mugambi wabo wari ugamije gukura abacuruzi benshi mu bucuruzi.
Mu nkuru ya Radiookapi ivuga ko Abacuruzi b’abagore b’Abanyekongo bayitangarije ko bahombye amafaranga agera kuri 20,000 USD mu minsi ine ishize. Basaba ko inzego z’ubuyobozi bw’imijyi yombi zafatanya kugira ngo iki kibazo gikemuke vuba.
