Mu karere ka Kirinyaga muri Kenya, haravugwa inkuru itangaje y’abajura binjiye mu rusengero rwa ACK St. Matthew’s Mutithi Church, aho banyweye divayi, barya imigati yera isanzwe ikoreshwa mu masakaramentu, banatwara ibikoresho by’urusengero birimo na piano ikoreshwa n’abaririmbyi.
Ibi byamenyekanye mu gitondo ubwo abaririmbyi bageraga ku rusengero bagasanga piano yaburiwe irengero, bagahita batabaza ubuyobozi bw’urusengero.
Umuyobozi wungirije w’urusengero, Eliud Githaka, yatangaje ko ibyo byabaye ari agahomamunwa kandi byateye ubwoba abakirisitu.
Abaturage bavuga ko bakeka ko umurinzi w’ijoro yaba yari asinziriye ubwo ibyo byabaga, kuko ngo ntiyigeze amenya ko hari abinjira.
Bamwe mu batuye hafi y’urusengero babwiye itangazamakuru ati: “Turakeka ko umuzamu aba asinziriye kuko nta na kimwe yari yabonye,”
Polisi yageze ku rusengero mu ijoro ryo ku wa Mbere, itanga icyizere ko iperereza ryatangiye kugira ngo hamenyekane abakoze iryo kosa ndetse n’icyo ryari rigamije.
Ubuyobozi bw’urusengero bwatangaje ko bugiye gushaka abashinzwe umutekano b’imbere mu rusengero aho gukomeza kwishingikiriza ku mukozi umwe utari umwe. “Tugiye guhindura uburyo ducungamo umutekano, kuko twabonye ko tutagomba gucungira kuri bamwe batubera ikibazo.”
