Mu gace ka Homa Bay muri Kenya, abaturage barenga ibihumbi bibiri, barimo abanyeshuri ba Mawego National Polytechnic, bakoze imyigaragambyo idasanzwe ubwo bikoreraga umurambo w’umusore wabo, Albert Ojwang, bawujyana kuri sitasiyo ya polisi.
Albert Ojwang wabaye umunyamakuru wikorera ku giti cye (blogger), yapfiriye mu maboko ya polisi ku wa 7 Kamena 2025.
Nk’uko raporo y’abaganga yabitangaje, urupfu rwe rwaturutse ku gukubitwa mu mutwe bikomeye. Abaturage ntibemera ibisobanuro byatanzwe na polisi, ahubwo bashinja inzego z’umutekano kugira uruhare mu rupfu rwe.
Mu mashusho yasakaye ku mbuga nkoranyambaga, abaturage bari mu myenda y’ishuri n’abandi baturutse mu midugudu itandukanye, bagaragara bikoreye isanduku irimo umurambo wa Albert, baririmba indirimbo zo kwamagana ihohoterwa n’ubugome bwa polisi.
Uwo muhango wihariye wabaye nk’ikimenyetso gikomeye cy’umubabaro n’umujinya w’abaturage, basaba ko ababigizemo uruhare bashyikirizwa ubutabera, ndetse hagakorwa n’iperereza ryihariye ku rupfu rw’uwo musore.
Ibi bibaye mu gihe impaka ku ihohoterwa rikorerwa abaturage n’inzego z’umutekano zikomeje kwiyongera muri Kenya, by’umwihariko mu rubyiruko rusaba impinduka mu mikorere ya polisi.
