Abasirikare bakomeye bo mu ngabo za Repubulika Iharanira Demokarasi ya Congo bashinjwa kugerageza guhungabanya inzego z’igihugu, boherejwe muri gereza ya gisirikare ya Ndolo y’i Kinshasa.
Mu mezi menshi ashize ni bwo abo basirikare batawe muri yombi bakekwaho umugambi wo kugerageza guhirika ubutegetsi bwa Perezida Félix Antoine Tshisekedi.
Aba basirikare biteganyijwe ko bazagezwa imbere y’ubutabera mu minsi iri imbere, baregwa ibyaha birimo kugirana umubano n’abagizi ba nabi, gucurira umugambi mubisha umukuru w’igihugu, kugerageza kwica, kugambanira igihugu no kugirana umubano na Leta y’igihugu cy’amahanga.
Radiyo Mpuzamahanga y’Abafaransa (RFI) ivuga ko ba Jenerali 11 na ba Ofisiye bakuru 13 ari bo bakurikiranwe.
Aba barimo Lt. Gen Franck Ntumba wahoze ari umuyobozi w’ibikorwa bya gisirikare mu biro bya Perezida Félix Tshisekedi, Gen. Christian Tshiwewe Songesha wahoze ari Umugaba Mukuru w’Ingabo za RDC na Général-Major Christian Ndaywel wahoze akuriye ubutasi bwa gisirikare mbere yo kugirwa Umugaba w’Ingabo zirwanira ku butaka.
