Urukiko rwa gisirikare rwa Bukavu rwatangije kuri uyu wa Mbere, itariki ya 11 Gashyantare 2025, urubanza rw’abasirikare 84 bo mu ngabo z’igihugu cya Repubulika ya Demokarasi ya Congo (FARDC), bashinjwa kwicwa abasivili nibura icumi i Kavumu na Miti, muri Kivu y’Amajyepfo, mu ijoro ryo ku itariki ya 7 kugeza ku ya 8 Gashyantare.
Ku Cyumweru, Ibiro by’umushinjacyaha, byari byatangaje ko aba basirikare bakurikiranweho ibyaha byo gukorera urugomo abasivili, rurimo kubica no kubasahura.
Umuryango w’Abibumbye wavuze ko mu mpera z’ukwezi kwa Mbere, ubwo M23 yagendaga yigarurira ahantu hanini ibyayiganishije ku gufata umujyi wa Goma, habaye ibikorwa byinshi byo kurenga ku mategeko, birimo kwica abakekwaho ibyaha bataburanishijwe, gusambanya abagore ku gahato no kubagira abacakara b’imibonano mpuzabitsina.
Ibiro bya LONI bishinzwe uburenganzira bwa muntu bivuga ko abarwanyi ba M23, abasirikare ba Kongo n’inyeshyamba zishyigikiye guverinoma bose bagize uruhare muri aya mabi.
Ibiro by’umushinjacyaha wa gisirikare byabwiye Reuters ko bashinjwa ubwicanyi, gusambanya ku ngufu, ubusahuzi no kwigomeka.
Byongeyeho ko hari n’abandi batawe muri yombi mu bice bisatira amajyepfo ku birego nk’ibyo, nabo baza kugezwa mu bucamanza.
Sosiyete Sivile ya Kavumu, umujyi muto uri mu birometero 35 mu majyaruguru ya Bukavu, yavuze ko ku mugoroba wo kuwa Gatanu, abasirikare bahunze urugamba bishe abantu 10, barimo 7 basanze mu kabari.
Aba basirikare ba FARDC batangiye kuburanishwa ni abataye urugamba Mbere y’ifatwa ry’agace ka Nyabibwe muri Kivu y’Amajyepfo mu burasirazuba bwa Repubulika ya Demokarasi ya Congo.
