Abasirikare barindwi bo mu ngabo za Uganda (UPDF), biciwe mu mirwano ikaze yari igamije gufata umujyi wa Sabiid-Anole wo muri Somalia.
Iyo mirwano yiswe “Operation Silent Storm”, ingabo za Uganda zifatanyije n’iza Somalia ndetse n’izindi zo mu bihugu bigize ubutumwa bw’Umuryango wa Afurika bwo kugarura amahoro muri Somalia (AUSSOM) zari ziyihanganyemo n’inyeshyamba zo mu mutwe wa Al Shabaab.
Ni imirwano yamaze iminsi itatu.
Umuvugizi w’Ingabo za Uganda, Brig Felix Kulaigye, yatangaje ko ibyihebe 30 bya Al Shabaab ari byo byayiciwemo.
Ingabo za Uganda kandi zashoboye kubona intwaro nyinshi Al Shabaab yari yarahishe, zinashobora gusenya ibiturika abarwanyi b’uriya mutwe bari baragiye batega mu bice bitandukanye by’uriya mujyi.
Umuyobozi w’Ingabo za AUSSOM, Lt. Gen Sam Kavuma, yashimye ubutwari ingabo zihuriweho zagaragaje mu gihe zari zihanganye n’umwanzi.
Yagize ati: “Ndashima ubutwari bw’ingabo zacu z’inyamwete za AUSSOM-UPDF n’Ingabo za Somalia. Iyi Operasiyo iri mu bigize ingufu zacu zigamije guca intege Al Shabaab ndetse no gushyira mu bikorwa gahunda ya Somalia izatuma inshingano z’umutekano zishyikirizwa gake gake ingabo za Somalia.”
Imirwano yabaye yasize Uganda itakaje abasirikare barindwi, gusa ingabo z’iki gihugu n’abafatanyabikorwa bazo bashoboye kwigarurira Sabiid-Anole yari indiri ya Al Shabaab.
Biteganyijwe ko muri iki cyumweru ari bwo iriya mirambo izajyanwa muri Uganda kugira ngo ishyingurwe mu cyubahiro cya gisirikare.
