Umutwe w’abasirikare badasanzwe ba Madagascar, kuri uyu wa Kabiri watangaje ko wakuyeho ubutegetsi bw’iki gihugu.
Uyu mutwe wabitangaje nyuma y’imyigaragambyo yari imaze iminsi mu guhugu yatumye Perezida Andry Rajoelina ahunga.
Umutwe wa CAPSAT nyuma yo guhirika ubutegetsi wahise uhagarika inzego zose z’ingenzi mu gihugu, gusa utanga isezerano ry’uko muri iki gihugu hagomba kuba amatora mu myaka ibiri iri imbere.
Col Michael Randrianirina uyobora uriya mutwe ni we wahise ugirwa Perezida wa kiriya gihugu, gusa Perezidansi yacyo yashimangiye ko Perezida Rajoelina ari we ukiyoboye.
Igisirikare cyatangaje ko cyahiritse Rajoelina mu gihe kuri uyu wa Kabiri yari yasheshe Inteko Ishinga Amategeko.
Uyu mugabo kugeza ubu bitazwi aho aherereye, aheruka gutangaza ko yahisemo guhunga nyuma yo kumenya ko hariho umugambi wo kumwica.
