Katika juhudi za kuimarisha ushirikiano kati ya soka, maendeleo na uchumi barani Afrika, vilabu viwili vikubwa kutoka Ulaya — AC Milan ya Italia na AS Monaco ya Ufaransa — vimeingia kwenye makubaliano ya ushirikiano na Jamhuri ya Kidemokrasia ya Congo (DRC).
Mnamo tarehe 23 Juni 2025, AC Milan ilitangaza ushirikiano na Wizara ya Utalii ya DRC, kama sehemu ya mpango wa serikali ya Italia uitwao Mattei Plan for Africa, unaolenga kuinua taswira ya DRC kimataifa.
Mpango huo unahusisha kutangaza vivutio vya utalii, tamaduni na kusaidia miradi ya elimu na michezo kupitia taasisi ya Fondazione Milan.
Aidha, kituo kipya cha mafunzo ya soka kitapatiwa nafasi nchini DRC ili kukuza vipaji vya vijana, hasa kutoka Afrika ya Kati na Kusini mwa Jangwa la Sahara ambako AC Milan ina mashabiki wengi.
Mnamo tarehe 24 Juni 2025, AS Monaco nayo ilitangaza ushirikiano wa miaka minne kupitia mpango wa “R.D. Congo, Moyo wa Afrika,” ukidhaminiwa na Wizara ya Michezo na Burudani ya Congo.
Ushirikiano huu utajikita katika kukuza vipaji vya vijana, kuboresha mafunzo na uongozi wa soka nchini, na kuitangaza DRC kupitia mitandao ya kijamii na jezi rasmi za timu.
Waziri wa Michezo wa DRC, Didier Budimbu, alisema kuwa ushirikiano huo “sio makubaliano ya kawaida bali ni dira mpya ya kubadilisha michezo na uchumi wa Congo kupitia ushirikiano na taasisi kubwa za kimataifa za michezo.”
