Ubuyobozi bwa AFC/M23 buratangaza ko kuri uyu wa Mbere Ingabo z’ihuriro rya Kinshasa zagabye ibitero birimo urugomo rukabije hirya no hino ku mirongo y’urugamba, byibasiye ahanini ahantu hatuwe cyane.
Ibi byatangajwe mu itangazo ryihutirwa ryashyizwe ahagaragara na AFC/M23 ibinyujije kuri X ku mugoroba wo kuri uyu wa Mbere.
Iri tangazo rigira riti: “Mu rukerera rwo kuri uyu wa Mbere, itariki ya 8 Nzeri 2025, ingabo zishyize hamwe z’ubutegetsi zirimo FARDC, FDLR, Mai-Mai Wazalendo, Abacanshuro, n’Ingabo z’igihugu cy’u Burundi, zagabye igitero cy’urugomo rudasanzwe ku mirongo yose y’urugamba”.
AFC/M23 ivuga ko ibi bitero, “byateguriwe muri Uvira na Bujumbura, byibasiye nkana uturere dutuwe cyane hakoreshejwe imbunda za rutura na drones”.
Ihuriro rya AFC / M23 ryatanze umugabo ku banyagihugu ndetse n’amahanga ryongera gushimangira ko ryiyemeje bidasubirwaho kurinda no kurengera abaturage b’abasivili no gukuraho icyabahungabanya cyose aho cyaturuka.
