Kuri uyu wa Gatatu, itariki ya 26 Ugushyingo 2025, mu kiganiro n’abanyamakuru i Goma, AFC / M23 yamaganye ibikomeje gutangazwa na Kinshasa ishimangira ko nta bikorwa byihutirwa by’ubutabazi bikenewe mu turere twabohowe, ishimangira ko ahubwo “ikibazo nyacyo kiri mu turere tugenzurwa n’ubutegetsi bwa Kinshasa”.
Bane mu bayobozi bakuru b’uyu mutwe – Fanny Kayembe, wo mu rwego rushinzwe Imari; Chantal Murekatete, Umujyanama wa Guverineri wa Kivu y’Amajyaruguru; Freddy Ndongozi, Umujyanama wa Guverineri wa Kivu y’Amajyepfo; na Lawrence Kanyuka, Umuvugizi w’uyu mutwe, batanze raporo yo kuvuguruza, ishyigikiwe n’imibare, ivuguruza mu buryo butaziguye raporo ya guverinoma.
AFC/M23 iti: “uduce twabohowe ntabwo turi mu bibazo; ni Kinshasa yitwaza imvugo y’ubutabazi muri gahunda yayo bwite ya politiki. Kinshasa ihimba ikibazo”. Abayobozi b’uyu mutwe baramagana amakuru yo guca igikuba “nkana aturuka i Kinshasa, agamije gukomeza kugaragaza ko hakenewe ibikorwa by’ubutabazi byihutirwa ku nyungu zayo za politiki, cyane cyane ku bijyanye n’imicungire y’ibigo by’imari n’ikibuga cy’indege cya Goma.
Ku bayobozi ba AFC/M23, izi mvugo ntabwo zishingiye ku kuri kuri terrain cyangwa ku makuru y’ubutabazi ahari. Ukuri kwagenzurwa kwerekana ko ubutabazi bugera ku babugenewe, hari umutekano ndetse n’urujya n’uruza mu bwisanzure bitandukanye n’ibivugwa na leta nk’uko Chantal Murekatete avuga, wemeza ko imiryango itabara imbabare ikora nta nkomyi mu turere twa Masisi, Rutshuru, Lubero, na Nyiragongo.
Imibare yatanzwe na Chantal Murekatete irivugira ubwayo: ibigo 11 bya Loni, imiryango itegamiye kuri leta mpuzamahanga 91, n’imiryango itegamiye kuri leta yo mu gihugu 603 ikora buri munsi muri utwo turere. Kuva muri Mata, abakozi mu by’ubutabazi 4966 batambutse mu bwisanzure, kandi imfashanyo nini zatanzwe nta nkomyi, imisoro itemewe, cyangwa iterabwoba ritaziguye.
Ibyiyongera kuri ibi ni ukuri kwirengagijwe na Kinshasa: nk’inzira zo ku butaka zitekanye, imihanda ikinguye, n’uruhererekane rw’imodoka zigenda mu mwuka ubona ko ibintu bigenda.
Abayobozi bakuru ba AFC / M23 bavuga kandi ko isubukurwa ry’ibikorwa by’ubukungu rigaragara: Habaye iherezo rya bariyeri zitemewe, guhuza imisoro, kubura kw’abambura abantu mu mihanda, no gutembera mu bwisanzure byagarutse.
Bashimangira ko amasoko yuzuye, kandi abona ibicuruzwa, ndetse hakaba no kugemurira uturere tukigenzurwa na Kinshasa. Ibiciro by’ibiribwa ngo byaragabanutse, nk’ikimenyetso cy’ubukungu bwifashe neza hamwe n’ubucuruzi bwazamutse.
Igihe cy’ifatwa ry’aho bagenzura, abantu barenga 576.000 bavanwe mu byabo bariyandikishije mu turere twibasiwe. Muri iki gihe, inkambi bari barimo hafi ya zose zarazimye mu buryo busanzwe: imiryango isubira mu ngo, ibintu bidasanzwe cyane mu gihugu aho umubare w’abaturage bahatirwa kuva mu byabo ugenda wiyongera.
Kuri AFC / M23, uku gutaha ku bwinshi n’ikimenyetso simusiga cyerekana ko umutekano wifashe neza. Gufunga banki: politiki, ntabwo ari ubumuntu. Abayobozi baramagana ifungwa rya banki mu turere twabohowe, bavuga ko ari ibikorwa bya Kinshasa. Nk’uko AFC / M23 ibivuga, iki cyemezo gicaa intege ingo, ubucuruzi, imiryango itegamiye kuri Leta, ndetse n’ubukungu bwaho.
Igitutu ku kibuga cyindege cya Goma
Ubwo yabazwaga ku kijyanye no gufungura ikibuga cy’indege cya Goma, AFC/M23 yavuze ko iyi ari gahunda ya politiki yihishe mu butabazi bwihutirwa. Abayobozi ba AFC / M23 bagaragaza ko nta bikorwa byihutirwa by’ubutabazi bihari byabisobanura. Imihanda irakora, imfashanyo ziratambuka, n’abakozi bashinzwe ubutabazi barakora.
Kuri bo, igitutu mpuzamahanga cyongerewe ingufu n’ubutegetsi bwa Kinshasa mu buryo bufatika budafite aho buhuriye no kurengera abaturage.
Abayobozi bakuru ba AFC / M23 barasaba abafatanyabikorwa mpuzamahanga gutekereza neza bakabona ko uturere twabohowe tutakiri ahantu hakeneye ubutabazi bwihutirwa, ahubwo ni agace kari mu nzibacyuho igana ku: kugarura ubukungu, kugarura serivisi z’imibereho, kongera kubaka ubuyobozi, no gutekanisha ku buryo burambye.
