Refa Amida Hemedi ni miongoni mwa waamuzi watatu waliosimamishwa na Shirikisho la Soka la Rwanda (FERWAFA) kwa tuhuma za kuhusika katika upangaji wa matokeo (match fixing). Hata hivyo, Amida anadai kuwa alifutiwa kazi bila kupewa nafasi ya kujieleza, na hajawahi kujulishwa rasmi kuhusu uamuzi huo.
Katika mahojiano na Televisheni ya Rwanda, Amida alisema kuwa amekuwa akishutumiwa kwenye mitandao ya kijamii na watu mbalimbali, hata marafiki wakimhoji kwa nini “hajawafundisha jinsi ya kubeti kwenye mechi.” Anasema hajapewa mechi yoyote kwa karibu miaka miwili, na alisimamishwa bila sababu iliyoelezwa rasmi.
“Nimekaa mwaka mmoja na nusu au karibu miwili bila kusimamia mechi. Nimesimamishwa kwa sababu nisizozijua. Sikuwahi kuelezwa kuwa nina makosa, wala kupewa barua au hata barua pepe.”
Amida anasema kuwa hakuna ushahidi wowote dhidi yake, na kuwa uamuzi huo umeathiri pakubwa maisha yake na heshima yake kama refa.
Kwa upande wake, FERWAFA inamshutumu Amida kwa kuwaunganisha waamuzi na watu wanaohusika na upangaji wa matokeo ya mechi. Waamuzi wengine waliosimamishwa ni Uwimana Ally na Mbarute Djihadi, ambao wanatuhumiwa kuwahamasisha wengine kubeti na kupokea pesa kutoka kwa wachezaji wa mechi zilizopangwa.
Amida sasa anasema kuwa anatafuta haki na kutakasa jina lake, na ana matumaini kuwa haki itatendeka.
