Leta ya Repubulika Iharanira Demokarasi ya Congo, yahagaritse ibikorwa by’amashyaka 12 atavuga rumwe n’ubutegetsi bwa Perezida Félix Antoine Tshisekedi.
Byatangajwe na Minisitiri w’Umutekano w’Imbere mu Gihugu, Jacquemain Shaban, ku wa Gatanu tariki ya 31 Ukwakira 2025.
Amashyaka yahagaritswe arangajwe imbere na PPRD rya Joseph Kabila Kabange wahoze ari Perezida wa RDC, LGD rya Augustin Matata Mponyo wahoze ari Minisitiri w’Intebe, UDA rya Claude Lubaya wabaye umudepite na Piste rya Seth Kikuni.
Harimo kandi AAP rya Theophile Mbemba wabaye Minisitiri w’Umutekano w’Imbere mu gihugu, MCPR rya Jean Claude Vuemba, ATD rya Joseph Makila wabaye Guverineri w’intara ya Equateur, MLP rya Franck Diongo n’andi.
Minisitiri Shabani yavuze ko aya mashyaka bayashinja “kurenga ku mahame menshi agenga amashyaka, arimo gusigasira ubumwe bw’abanegihugu, ubusugire n’umutekano.”
Uyu yahise asaba urukiko rushinzwe kurengera itegeko nshinga rya RDC gusenya aya mashyaka, hashingiwe ku ngingo y’itegeko rigenga amashyaka.
Aya mashyaka yahagaritswe nyuma y’iminsi mike ba nyirayo bahuriye i Nairobi muri Kenya, aho bashingiye ihuriro ryiswe ‘Sauvons la RDC” rirwanya ubutegetsi bwa Perezida Tshisekedi.
Ni ihuriro kuri ubu riyobowe na Kabila.
