Ikipe ya APR FC yatangiye neza irushanwa rya CECAFA Kagame Cup riri kubera muri Tanzania, nyuma yo gutsinda Bumamuru FC y’i Burundi ibitego 2-0.
Amakipe yombi yari yahuriye mu mukino wa mbere wo mu tsinda B wabereye kuri Stade ya KMC, i Dar Es Salaam.
Umunya-Burkina Faso, Cheikh Djibril Ouattara ni we wafunguye amazamu ku munota wa karindwi w’umukino, ku mupira wa Coup-Franc yatewe na Bugingo Hakim bikarangira Ouattara awuteretse mu izamu n’ikirenge.
Igice cya mbere cy’umukino cyarangiye ikipe y’Ingabo z’Igihugu iri imbere n’igitego 1-0.
Iyi kipe yarushije cyane Bumamuru mu gice cya kabiri, yatsinze igitego cya kabiri ku munota 73 biciye kuri rutahizamu William Togui.
Ni ku mupira uyu munya-Côte d’Ivoire yari ahawe n’umunya-Burkina Faso, Raouf Memel Dao, mbere yo kuwutereka mu izamu.
Dao ni we watowe nk’umukinnyi w’umukino, ahembwa Tsh 500,000.
APR FC yageze ku mukino wa nyuma wa CECAFA Kagame Cup mu mwaka ushize wa 2024, izagaruka mu kibuga ku wa Gatandatu w’iki cyumweru ihura na Mlandege FC yo mu birwa bya Zanzibar.
