Ishyirahamwe ry’Abanyamakuru mu Rwanda (ARJ), ku bufatanye n’Urwego rw’Imiyoborere (RGB), Ihuriro ry’Abanyamakuru b’Abagore (ARFEM) n’Urwego rw’Abanyamakuru bigenzura (RMC), ryatangije ku mugaragaro gahunda yo gutoranya umunyamakuru w’umwaka 2025 binyuze mu bihembo bya Development Journalism Awards (DJA2025).
Iyi gahunda igamije gushimira no guha icyubahiro abanyamakuru bagaragaza ubunyamwuga buhebuje, ubunyangamugayo, n’uruhare mu guteza imbere sosiyete nyarwanda binyuze mu itangazamakuru rifite ireme.
Bitandukanye n’uko byakorwaga, kuri iyi nshuro abanyamakuru ubwabo ni bo bagomba gutanga abakandida bifuza ko bazavamo umunyamakuru w’umwaka, mu rwego rwo kwimakaza umuco w’ubufatanye n’ubwisanzure mu mwuga.
Abanyamakuru bazatangwa bazasuzumwa hagendewe ku bunyamwuga (ukuri, amahame ngengamyitwarire y’umwuga, kuzura kw’inkuru ndetse n’ingaruka inkuru bakoze yagize), imyitwarire (ubunyangamugayo, kubazwa inshingano, no kubaha abandi) ndetse n’inshingano rusange (uburyo bagirana umubano mwiza n’abandi banyamakuru n’abaturage, haba ku mbuga nkoranyambaga cyangwa hanze yazo).
ARJ yunzemo iti: “Turashaka umunyamakuru ukora akazi keza k’itangazamakuru gafite akamaro ku baturage, wubahiriza amahame y’umwuga, ugira umwimerere n’ubunyamwuga.”
Uru rwego rwasabye abanyamakuru bazatoranywa gufasha bagenzi babo bazabatoranya, bakababera urugero mu myitwarire myiza haba ku mbuga nkoranyambaga no hanze yazo.
Uwatanze izina ry’umunyamakuru yifuza ko yegukana igihembo we nanone asabwa kohereza link asobanura impamvu yatumye aba ari we ahitamo.
Abanyamakuru bafite ikarita y’itangazamakuru yemewe nibo bemerewe gutanga amazina y’abakandida, ndetse kwiyamamaza birabujijwe.
Umunyamakuru uzitabira agomba kuba Umunyarwanda, afite byibura imyaka itanu y’unurambe mu itangazamakuru nk’umwuga, kandi afite ibihangano bifatika (inkuru, ibiganiro, filime ndangamateka, n’ibindi) byasohotse hagati ya 1 Ugushyingo 2024 na 31 Ukwakira 2025.
Abahatana bazasuzumwa hashingiwe ku bunyamwuga, imyitwarire myiza, n’uruhare mu iterambere ry’umwuga, harimo no gufasha bagenzi babo mu mwuga no kwitwara neza haba kuri murandasi no mu buzima busanzwe.
Uko itoranya rizagenda
Gahunda izanyura mu byiciro bitatu:
Icyiciro cya mbere (30 Ukwakira–4 Ugushyingo 2025):
Abanyamakuru bazatanga amazina ya bagenzi babo bujuje ibisabwa. Ubunyamabanga Bukuru bwa ARJ buzasuzuma gusa niba abakandida bujuje ibisabwa byose.
Icyiciro cya kabiri (4 Ugushyingo 2025):
Abanditsi Bakuru b’ibitangazamakuru 10 bazaterana batange amanota ku bakandida bose, bareba ubucukumbuzi bw’inkuru, umwimerere, inyungu ifitiye abaturage n’udushya mu itangazamakuru. Abanyamakuru batanu ba mbere nibo bazashyirwa ku rutonde rwa nyuma.
Icyiciro cya gatatu (7 Ugushyingo 2025):
Mu nama y’abahawe ibihembo mu myaka yashize (DJA Alumni) izabera i Kigali, abanyamakuru 20 bazatora mu buryo bwa ranked choice (gutora mu rwego rwo gutondeka amanota) hifashishijwe ikoranabuhanga.
Nihaba kunganya amanota, uwatsinze azatorerwa mu buryo bwa gutombora (gutombora mu mucyo).
Guharanira ubunyangamugayo no gukorera mu mucyo
ARJ kuri ubu isaba ko nta gushakisha amajwi cyangwa kwamamaza bizemerwa mu gihe cy’itoranya, kandi uwabikora ashobora guhita akurwaho.
Amakuru y’amanota n’abatora azagirwa ibanga; hazatangazwa izina ry’utsinze gusa, mu gihe inyandiko zose z’ibyemezo n’amanota zizabikwa mu buryo bw’igenzura (audit).
Nk’uko ARJ ibivuga, intego y’ibi bihembo ni “gushimira itangazamakuru rifasha abaturage, ribakorera kandi ribazamura”, ndetse no guteza imbere indangagaciro z’ubunyamwuga, ukuri n’inyungu rusange.
