Jumatano, tarehe 4 Juni 2025, Ernest Rwamucyo alimkabidhi Rais William Ruto hati zake rasmi za utambulisho kama Balozi wa Rwanda nchini Kenya.
Balozi Rwamucyo alisema kwamba anathamini na kuheshimu urafiki wa kihistoria na ushirikiano wa muda mrefu kati ya mataifa haya mawili, uliojengwa juu ya heshima ya pande zote, maadili ya pamoja, na maono ya amani, ustawi na umoja wa kikanda.
Alibainisha kuwa uhusiano kati ya Rwanda na Kenya unaendelea kuimarika katika sekta kama vile biashara, miundombinu, elimu, usalama, na ushirikiano wa watu kwa watu.
Rwamucyo alilitaja taifa la Kenya kuwa mshirika muhimu, si tu katika mahusiano ya pande mbili bali pia katika jukwaa la kimataifa, hasa ndani ya Jumuiya ya Afrika Mashariki (EAC).
Alikuwa miongoni mwa mabalozi wapya waliowasilisha hati zao kwa Rais Ruto siku hiyo hiyo.
Rais Ruto aliwataka mabalozi hao kuwakilisha masilahi ya mataifa yao, lakini pia kuendeleza mahusiano mazuri kati ya nchi hizo na Kenya.
Rwanda na Kenya ni mataifa ya ndugu, wanachama wa Jumuiya ya Afrika Mashariki (EAC), na yamekuwa yakishirikiana kukuza sekta mbalimbali.
Ushirikiano wao umeimarishwa kupitia makubaliano 10 yaliyotiwa saini Aprili 2023, yaliyolenga kuendeleza kilimo, elimu, huduma za magereza, mafunzo ya kidiplomasia, teknolojia, afya, vijana, na maendeleo ya vyama vya ushirika.
Uwekezaji wa Wakenya nchini Rwanda unajitokeza katika nyanja mbalimbali kama elimu, afya, mabenki, na nyinginezo.
Rwamucyo hapo awali alikuwa Mwakilishi wa Kudumu wa Rwanda katika Umoja wa Mataifa kuanzia Oktoba 2023, na sasa anachukua nafasi ya Balozi Martin Ngoga aliyekuwa kwenye wadhifa huo tangu Septemba 2023.
Ameshawahi kuiwakilisha Rwanda katika nchi mbalimbali zikiwemo Japani, Malaysia, Ufilipino, Thailand, India, Sri Lanka, Bangladesh, Uingereza, na Ireland.
