Botswana inapanga kujenga mji wa kidijitali wa dola bilioni 1 unaoitwa Kalahari City katika jangwa, ukiigwa mfano wa Dubai. Mji huo utakuwa eneo maalum la kiuchumi, ukijumuisha kiwanda cha nishati ya jua cha 300 MW, mtandao wa maji endelevu, na miundombinu rafiki kwa mazingira.
Mji wa Kalahari utakuwa kitovu cha teknolojia, ukiwa na makampuni ya fintech, mifumo ya kisasa ya usafiri, na miundombinu ya kisasa ya kuvutia wawekezaji na kuendeleza ubunifu. Mradi huu unalenga kupunguza utegemezi wa Botswana kwenye madini ya almasi, kwa kusisitiza biashara, utalii, teknolojia, na nishati mbadala.
Maendeleo hayo yanatarajiwa kutoa ajira kati ya 20,000 hadi 30,000. Mji huo utakuwa na mahoteli ya kifahari, maeneo ya burudani, na vivutio vya kitalii.
Botswana: Mfano wa Kuigwa Afrika
Botswana ni nchi isiyo na pwani yenye asilimia 70 ya ardhi yake kuwa jangwa la Kalahari. Inapakana na Namibia, Zambia, na Zimbabwe. Ina idadi ya watu milioni 2.4, ambapo asilimia 80 ni wa kabila la Tswana.
Ni moja ya nchi chache barani Afrika zinazopambana vikali na rushwa, ikiwa ya tatu kwa uwazi, baada ya Cape Verde na Seychelles. Pia ni mzalishaji mkubwa wa almasi duniani.
Utalii ni nguzo muhimu ya uchumi, ukichangiwa na hifadhi nyingi za wanyamapori. Mji mkuu ni Gaborone. Mnamo 2024, uchumi wa Botswana ulikadiriwa kuwa na Pato la Taifa la dola bilioni 19.36, huku kila mtu akiwa na wastani wa dola 6,937.33.
Rwanda na Botswana: Mwelekeo Mmoja wa Maendeleo
Rwanda na Botswana zinafanana katika utawala bora na kupambana na rushwa. Rwanda ni ya nne barani Afrika, ikifuatiwa na Botswana ikiwa ya tatu.
Rwanda nayo imewekeza kwenye utalii na miundombinu mikubwa, kama uwanja wa ndege wa kimataifa wa Bugesera. Ushirikiano kati ya nchi hizi unaweza kuongeza idadi ya watalii kutoka Afrika Kusini mwa Jangwa la Sahara kwenda Rwanda, hasa kuona nyani wa milimani (gorilla) wanaopatikana tu Rwanda.
Miradi mikubwa ya miundombinu barani Afrika kama vile mji mpya jangwani wa Misri, daraja la Moses kati ya Misri na Saudia, na sasa Kalahari City, inaonyesha uwekezaji unaolenga kulikuza bara la Afrika kiuchumi.
