Abasirikare bagera kuri ijana b’Abanyekongo bagejejwe imbere y’urukiko rwa gisirikare rwa Butembo-Lubero, mu Ntara ya Kivu y’Amajyaruguru. Iburanisha ryatangiriye i Musienene, muri Teritwari ya Lubero, rireba abasirikare baregwa ibyaha byinshi birimo ubwicanyi, kwambura abantu, gufata ku ngufu, ubujura, gusahura, gukwirakwiza amasasu y’intambara, guhunga umwanzi, gutakaza intwaro n’ubutasi.
Umunsi wa mbere w’iburanisha wahariwe kumenya abaregwa. Muri rusange, abasirikare 67 bo mu mitwe itandukanye bari bitabye urukiko. Abandi bari bamaze guhungira i Beni, barafashwe bazasubizwa i Lubero kugira ngo baburanishwe hakurikijwe amategeko agenga ubutabera bwa gisirikare bwa Congo, nk’uko byatangajwe na Lt. Col. Mak Hazukay, umuvugizi w’ibikorwa bya Sukola 1 muri Grand Nord.
Avuga ko uru rubanza rufite intego yo kuba isomo ku bandi basirikare bari mu bikorwa bitandukanye mu Ntara ya Kivu y’Amajyaruguru, byitwa ko ari ukurengera igihugu.
Ati: “Aba basirikare bahunze urugamba bakoze ibikorwa bitesha agaciro Ingabo za Congo. Hano hari abagera ku ijana, ariko twerekanye 67 muri bo hano, kuko tutarakira abari i Beni. Twerekanye abakoze ibyaha i Lubero, Musienene, Kimbulu no hafi ya Butembo. Niyo mpamvu y’urubanza : gukemura ibibazo by’aba basirikare badafite ikinyabupfura basuzuguza Repubulika. Bagerageje gutesha agaciro ingabo zacu no guha umwanzi impamvu ”.
Ubusahuzi hamwe no guteza ubwoba
Ibi byabaye ku wa Gatatu, itariki 19, Ku wa Kane, itariki 20 no ku wa Gatanu, itariki 21 Gashyantare 2025. Itsinda ry’abasirikare bahunze imbere y’inyeshyamba za M23 mu majyepfo ya Lubero, ryateye ubwoba muri rubanda rirasa amasasu menshi mu midugudu myinshi iherereye ku muhanda wa Butembo-Goma, guhera kuri komini ya Lubero-Centre, Kimbulu, Musienene no mu yindi midugudu yegereye Butembo. Bishoye mu bikorwa byo gusahura, kwangiza n’ibindi bikorwa bitandukanye bifatwa nk’ibyaha n’ubushinjacyaha bwa gisirikare.
