Ikigo CIES Football Observatory gisanzwe gikora ubushakashatsi ku mupira w’amaguru, cyatangaje ko umunya-Espagne Lamine Yamal ari we wegukana igihembo cya Ballon d’Or kiri butangwe kuri uyu wa Mbere.
Ibirori byo gutanga iki gihembo gitangwa n’ikinyamakuru France Football biri bubere ahitwa Théâtre du Châtelet, i Paris mu Bufaransa.
Mu gihe habura amasaha make ngo iki gihembo gitangwe, amatsiko ku mukinnyi ugitwara kugeza ubu utaramenyekana akomeje kuba menshi; n’ubwo Umufaransa Ousmane Dembele usanzwe akinira Paris Saint-Germain na Lamine Yamal wa FC Barcelona ari bo bahabwa amahirwe menshi.
Mu gihe buri wese akomeje gutanga indagu ze, CIES Football Observatory, yamaze gutangaza urutonde rw’abakinnyi 100 bahize abandi igendeye ku mibare y’ibyo bakoze mu mwaka ushize w’imikino.
Ni imibare kiriya kigo cyashingiye ku bintu bitandatu birimo gukina imipira yo mu kirere, kugarira ku butaka, kubaka umukino, kuwugenzura no kuwuyobora, gutanga imipira ivamo ibitego ndetse no gutsinda ibitego.
Bijyanye n’iyi mibare, Lamine Yamal yashyizwe ku mwanya wa mbere ahigitse abarimo Kylian Mbappé wa Real Madrid, na Pedri Gonzalez wa FC Barcelona bamukurikira.
Ousmane Dembele uri guhabwa amahirwe yo gutwara Ballon d’Or ye ya mbere yashyizwe na kiriya kigo ku mwanya wa karindwi, inyuma y’abarimo Virgil van Dijk wa Liverpool, Michael Olise wa Bayern Munich na Mohamed Salah wa Liverpool.
Abakinnyi 10 CIES Football Observatory ibona nk’abahiga abandi ku Isi
1. Lamine Yamal (Barça)
2. Kylian Mbappé (Real)
3. Pedri (Barça)
4. Virgil van Dijk (Liverpool)
5. Michael Olise (Bayern)
6. Mohamed Salah (Liverpool)
7. Ousmane Dembélé (PSG)
8. Joshua Kimmich (Bayern)
9. Achraf Hakimi (PSG)
10. Vinicius Jr (Real)
