Impinduka nshya zagaragaye mu rubanza rw’iyicwa ry’impuguke ebyiri z’Umuryango w’Abibumbye ziciwe ku butaka bwa Repubulika ya Demokarasi ya Congo muri Werurwe 2017, aho Urwego rw’ubushinjacyaha rwashinje ku wa Kane, itariki ya 16 Werurwe 2023, Col. Jean de Dieu Mambweni nk’uwakoze ubwo bwicanyi bwakorewe Zaïda Catalan na Michael Sharp .
Nyuma yo gusuzuma ibimenyetso bishya, mu Rukiko Rukuru rwa Gisirikare i Kinshasa, ubushinjacyaha bwagaragaje ko Colonel Jean de Dieu Mwambeni ari we wagiranye amasezerano n’abarwanyi ba Kamwena Nsapu ngo bice impuguke zombi za ONU.
Kugira ngo bugaragaze ishingiro ry’ibirego byabwo, ubushinjacyaha bwashyize imbere y’Urukiko Rukuru rwa Gisirikare, inyandikomvugo, ubutumwa bwavuye muri telefoni hamwe na gahunda z’iminota itandukanye y’inama zakozwe n’inama y’umutekano y’intara ya Kasaï-Central.
Iri hishurwa rishya rije ryiyongera ku cyemezo cy’urukiko rwa gisirikare rw’icyahoze ari Kasaï-Occidental, rwahamije uregwa, Colonel Jean de Dieu Mambweni, kuba ataratabaye umuntu uwo ari we wese wari mu kaga, muri ubwo bwicanyi bwombi bwakorewe impuguke za Loni.
Ku ruhande rwe, Colonel Mambweni yemeye ko yakiriye ku itariki ya 10 Werurwe 2017, mu rugo rwe, aba bantu bombi bishwe, umunsi umwe mbere y’uko basura umuryango wa Kamwena Nsapu.
Iburanisha ritaha muri uru rubanza riteganijwe ku wa Kane, itariki ya 23 Werurwe 2023 nk’uko iyi nkuru dukesha Politico.cd ivuga.
Twabibutsa ko Umunyamerika Michael Sharp n’Umunyasuwedekazi, Zaida Catalan, bari impuguke z’Umuryango w’Abibumbye, bishwe kuwa 12 Werurwe 2017 ubwo bari mu iperereza ku bugizi bwa nabi bwakorewe mu ntara ya Kasaï-Central, icyo gihe yari yugarijwe n’ibikorwa by’inyeshyamba za Kamwina Nsapu.
