Icyorezo cya virusi ya Corona gihangayikishije cyane Isi, gikomeje gushegesha ubuyobozi bukuru bw’igisirikare cya Repubulika iharanira Demokarasi ya Congo (FARDC), ku buryo mu minsi icumi ishize kimaze guhitana abasirikare babiri bakuru, mu gihe abandi benshi barwariye mu bitaro.
Ku wa 29 Gicurasi ni bwo hamenyekanye inkuru y’akababaro y’urupfu rwa Professeur Docteur, Général de Brigade Andy Munyapara waguye i Kinshasa.
Gén. Munyapara yari umuganga mu gisirikare cya Repubulika iharanira Demokarasi ya Congo, bikaba byaremejwe ko yazize icyorezo cya virusi ya Corona yanduye ubwo yitaga ku barwayi bacyo, dore ko yari umuhuzabikorwa w’itsinda rishinzwe kurwanya iki cyorezo mu gisirikare cya Congo Kinshasa.
Nyuma y’iminsi mike Gen. Munyapara yitabye Imana, ku wa mbere tariki ya 08 Kamena Général Major Daniel Kashale wari umugaba w’ingabo za Congo ushinzwe ibikorwa bya gisirikare na we yitabye Imana.
Media Congo ivuga ko abantu ba hafi ya nyakwigendera Gen. Kashale bemeza ko na we yazize icyorezo cya Covid-19 yari amaze iminsi arwaye.
Uretse aba babiri amakuru avuga ko hari n’abandi bayobozi bakuru ba FARDC barwariye mu bitaro nyuma yo kwandura icyorezo cya virusi ya Corona, barimo umugaba mukuru w’ingabo za Repubulika iharanira Demokarasi ya Congo, Gen. Célestin Mbala n’abandi bayobozi benshi bakuru bazo.
Repubulika iharanira Demokarasi ya Congo iri mu bihugu bya Afurika bikomeje gushegeshwa cyane n’icyorezo cya Covid-19, aho imibare y’ishami ry’Umuryango w’Abibumbye wita ku buzima (OMS) ishami rya Afurika, igaragaza ko muri iki gihugu habarurwa abarwayi ba Coronavirus 4,106 barimo 88 bahitanwe n’iki cyorezo.
Iki gihugu kandi gikomeje kugira uruhare mu bwiyongere bw’abanduye Covid-19 mu bihugu bituranye na cyo, aho nk’ubwiyongere bukomeje kugaragara mu karere ka Rusizi bufitanye isano n’abantu bahinjiye baturutse i Bukavu muri Congo Kinshasa.
