Umuhanzi w’icyamamare muri Nigeria no ku rwego mpuzamahanga, Davido (David Adeleke), yariwe amafaranga angana na miliyoni 75 z’amafaranga y’u Rwanda nyuma y’uko ikipe y’igihugu ya Nigeria, Super Eagles, isezererwa na Maroc muri kimwe cya kabiri cy’Irushanwa ry’Ibihugu bya Afurika (AFCON) 2025.
Uyu mukino wabaye ku wa 14 Mutarama 2026, kuri Stade Prince Moulay Abdellah i Rabat muri Maroc, urangira ari 0-0 mu minota 90 isanzwe, mbere y’uko Maroc itsinda Nigeria kuri penaliti 4-2 , ihita igera ku mukino wa nyuma w’irushanwa.
Davido yari yarakoze ipari y’amadolari 50,000 akoresheje urubuga rwa Stake, ashyira amahitamo atatu: ko Nigeria itsinda mu minota 90, ko amakipe yombi atsinda igitego, ndetse ko haboneka ibitego birenze 1.5.
Aya mahitamo yose yananiranye, bityo umuhanzi atakaza amafaranga yose yari yashyizemo.
Iyo ayo mahitamo aza kugenda neza, Davido yari kurya amafaranga arenga Miliyoni 522, kuko yari yahisemo igikubo 6.97. Icyakora, umupira w’amaguru ugira amayobera menshi, maze amahirwe aramuhinduka.
Nubwo umunyezamu wa Nigeria Stanley Nwabali yagerageje gutanga icyizere akuramo penaliti imwe, amakosa ya Samuel Chukwueze na Bruno Onyemaechi ni yo yahesheje Maroc intsinzi, penaliti za Hakimi, Ben Seghir, El Aynaoui na En-Nesyri zose zinjiye neza.
Davido yari yaragaragaje ko beti ye ayihuza n’urukundo afitiye igihugu cye, ndetse yari yanavuze ko ashoboraga kongera ayo mafaranga inshuro ebyiri iyo Nigeria igera ku mukino wa nyuma. Icyakora, urugendo rwa Super Eagles rwarangiriye aho, bituma ayo masezerano aburizwamo.
Uyu muhanzi uzwi cyane mu ndirimbo nka Unavailable, si ubwa mbere agaragaje gutsinda muri beti z’umupira w’amaguru, kuko mu matsinda ya AFCON 2025 yari yaratsindiye amafaranga menshi ku mukino wa Nigeria na Tanzania. Ariko kuri iyi nshuro, amahirwe ntiyari ku ruhande rwe.
One Response
ibaze iyo afasha abatishiboye illuminati