Ikipe ya Bayer Leverkusen yo mu Budage, yirukanye Umuholandi Erik Ten Hag yari imaze igihe gito ihaye akazi ko kuyibera umutoza mukuru.
Muri iyi mpeshyi ni bwo Erik Ten Hag wahoze atoza Manchester United yari yagizwe umutoza wa Bayer Leverkusen, nk’umusimbura wa Xabi Alonso werekeje muri Real Madrid.
Leverkusen yatwaye igikombe cya shampiyona cya 2023/2024, yamwirukanye amaze kuyitoza imikino ibiri yonyine.
Ubuyobozi bw’iyi kipe bwafashe icyemezo cyo kumwirukana, nyuma y’uko ku wa Gatandatu w’icyumweru gishize we n’abakinnyi be baguye miswi na Werder Bremen y’abakinnyi 10 ibitego 3-3.
Ni mu gihe Bayer Leverkusen byibura yari yageze ku munota wa 64 iyoboye umukino n’ibitego 3-1.
Ku munsi wa mbere wa shampiyona bwo iyi kipe yari yatsinzwe na Hoffenheim ibitego 3-1.
