Mwanasiasa wa upinzani nchini Jamhuri ya Kidemokrasia ya Congo (DRC), Martin Fayulu, ameiomba jumuiya ya kimataifa kusaidia katika kutatua tatizo la kundi la waasi la FDLR.
Fayulu alitoa ombi hilo katika hotuba ya maadhimisho ya Siku ya Uhuru wa DRC, aliyotoa kwa wananchi Jumatatu, tarehe 30 Juni.
Jumanne, Julai 1, DRC iliadhimisha miaka 65 ya uhuru kutoka kwa wakoloni wa Ubelgiji.
Hata hivyo, nchi hiyo bado inakabiliwa na changamoto za usalama, hasa mashariki mwa nchi, ambapo ghasia zimekuwa zikiendelea kwa takribani miaka 30.
Serikali ya Rwanda imesisitiza kuwa kundi la FDLR linajumuisha watu waliokuwa na jukumu katika mauaji ya kimbari dhidi ya Watutsi mwaka 1994, na kwamba kundi hilo ndilo chanzo cha machafuko nchini DRC na eneo la Maziwa Makuu.
Umoja wa Mataifa pia umetambua FDLR kama tishio la usalama, na azimio la Baraza la Usalama nambari 2773 linataka kundi hilo livunjwe kabisa, kwani linajulikana kushirikiana na jeshi la taifa la Congo.
Mwaka jana, Kinshasa na Kigali walianza mazungumzo huko Luanda kuhusu kuvunja FDLR kwa pamoja, lakini mpango huo ulivunjika dakika za mwisho.
Hata hivyo, sharti la kulivunja FDLR limebaki kwenye makubaliano mapya ya amani yaliyotiwa saini na DRC na Rwanda kwa msaada wa Marekani.
Fayulu, akizungumzia makubaliano hayo, alisema kuwa Congo haipaswi kubebeshwa lawama kwa uwepo wa FDLR, na akaitaka dunia kusaidia kutatua tatizo hilo.
“Tunaomba washirika wetu wa kimataifa waheshimu azimio la 2773 la Baraza la Usalama la UN na kutatua tatizo la FDLR, ambalo halipaswi kuwa lawama kwa Congo. Ukweli usemwe kama ulivyo,” alisema Fayulu.
Pia alikosoa mashambulizi dhidi ya Congo, akisema kuwa hayapaswi kuitwa ‘hatua za kujilinda’, kama inavyodaiwa kwenye makubaliano ya amani kati ya Rwanda na DRC.
Makubaliano hayo yanataka DRC ilivunje kundi la FDLR, na baadaye Rwanda iondoe hatua za usalama ilizoweka kujilinda.
