Urwego rw’ubugenzacyaha rwa Leta Zunze Ubumwe za Amerika (FBI) rwafunze abantu 31, barimo umutoza wa Portland Trail Blazers, Chauncey Billups, n’abakinnyi barimo Terry Rozier wa Miami Heat na Damon Jones wahoze akinira Cleveland Cavaliers.
Abo bose bakurikiranyweho kugira uruhare mu bikorwa byo kugena ibiva mu mikino no gukina imikino y’urusimbi mu buryo butemewe, bakoranye n’imiryango ya Mafia izwi nka Bonanno, Gambino, na Genovese.
Umuyobozi wa FBI, Kash Patel yatangaje ko “ari urubanza rw’amateka” kuko ari bwo bwa mbere hafashwe abantu benshi bafite aho bahuriye n’imikino ya NBA n’umuryango wa Mafia.
Yavuze ko ibikorwa byabo byakorwaga mu gihe cy’imyaka myinshi mu bihugu 11 byo muri Leta Zunze Ubumwe za Amerika, bigamije gukuramo amafaranga ari hagati ya miriyoni nyinshi z’amadolari.
Ibyaha bakurikiranyweho:
Gukoresha amakuru y’ibanga y’abakinnyi n’amakipe kugira ngo babone inyungu mu mategeko y’imikino y’urusimbi (“sports betting”).
Guhanga imikino (guhindura uko umukino ugomba kugenda) kugira ngo itsinda ry’abatega ritsinde.
Gukina imikino ya poker y’uburiganya, bakoresheje ikoranabuhanga ribafasha gutsinda abandi mu buryo butemewe.
Abafashwe ni Chauncey Billups (49) wafatiwe i Portland mu gitondo cyo ku wa kane nyuma y’umukino wa mbere wa shampiyona.
Terry Rozier (31) yafatiwe mu mujyi wa Orlando aho yari yagiye gukinira ikipe ye.
Damon Jones, wahoze ari umukinnyi ndetse n’umutoza wungirije muri Cavaliers, ashinjwa gukoresha amakuru y’ibanga ku bakinnyi ba NBA.
Komiseri wa NBA, Adam Silver yatangaje ko bari gukorana n’abashinzwe iperereza kugira ngo barebe uko irushanwa ryakomeza mu mucyo, kandi ko abakekwaho bose bazakurikiranwa mu buryo bw’amategeko.
