Umuyobozi w’ingabo z’ibihugu byo mu muryango wa Afurika y’iburasirazuba zikorera mu ntara ya Kivu y’Amajyaruguru muri Repubulika ya demukarasi ya Congo (EACRF), Maj. Gen. Jeff Nyagah, yahakaniye abakomeje kumubaza ibibazo bya politiki byerekeye ku mutwe witwaje intwaro wa M23.
Mu kiganiro yagiranye n’abanyamakuru i Goma kuri uyu wa 24 Mata 2023, Gen. Nyagah yabajijwe niba M23 iri kubahiriza icyemezo cyo kurekura ibice yafashe, asubiza ko iki kibazo ari icya politiki, kandi ngo mu nshingano ze, gusubiza ibibazo nk’iki ntibirimo.
Gen. Nyagah yagize ati: “Ntabwo gusubiza ibibazo bya politiki biri muri manda yacu, utari Umunyekongo cyangwa utari we. Habayeho guhagarika imirwano hagati ya FARDC na M23? M23 yaba iri gusubira inyuma? Yaba iri kujya ku kirunga cya Sabyinyo? Ese kuri site ya Sabyinyo hari ibikorwaremezo. Ibi ntibireba EACRF, ni ibibazo bya politiki.”
Uyu musirikare yasobanuye ko icyo EACRF yifuza ari uko imirwano yahagarara, umuhanda munini wa Bunagana-Kibumba-Goma n’uwa Kitshanga-Kilolirwe-Goma igakomeza gukora kandi ikagenzura imitwe yitwaje intwaro irenga 120 ikorera muri Kivu y’Amajyaruguru.
