Guverineri Jacques Kyabula w’Intara ya Haut-Katanga, yahamagajwe i Kinshasa kugira ngo atange ibisobanuro ku byo aheruka gutangaza kuri Joseph Kabila Kabange wahoze ari Perezida wa RDC na Corneille Nangaa ukuriye AFC/M23.
Minisitiri w’Umutekano w’Imbere muri RDC, Jacquemin Shabani, ni we wamuhamagaje, gusa amakuru avuga ko itegeko ryaba ryatanzwe na Perezida Félix Antoine Tshisekedi Tshilombo.
Kyabula mu butumwa yandikiwe na Minisitiri Shabani, yasabwe “guhagarika ibikorwa bye byose akitaba bitarenze amasaha 48.”
Uyu Guverineri yahamagajwe i Kinshasa, nyuma y’amasaha make atangaje ko “nyirabayazana y’intambara yo mu burasirazuba bwa RDC ni Kagame, aho kuba Kabila cyangwa Nangaa.”
Yunzemo ati: “Kabila na Nangaa ni abanye-Congo, ibibazo byabo bikwiye gukemurirwa mu muryango.”
Uyu mugabo yashimangiye ko Kabila na Nangaa ari abanye-Congo, mu gihe ubutegetsi bw’i Kinshasa bubafata nk’abagambanyi ndetse n’abanzi ruharwa babwo.
Nangaa yakatiwe igihano cya burundu, nyuma yo kwihuza n’umutwe wa M23 bagashinga ihuriro Alliance Fleuve Congo rigambiriye gukuraho ubutegetsi bwa Perezida Félix Antoine Tshisekedi.
Kuva Joseph Kabila yava mu buhungiro akerekeza mu mujyi wa Goma ugenzurwa na M23, na we Kinshasa yamushinje kujya mu mutwe ugambiriye gukuraho ubutegetsi bwayo.
