Muri raporo yasohotse mu ntangiriro z’iki cyumweru, Umuryango uharanira uburenganzira bwa muntu, HRW, uravuga ko abagize imitwe nibura itanu yitwaje intwaro ndetse n’Ingabo za Leta ya Congo, FARDC, bakoze ihohotera rishingiye ku gitsina mu burasirazuba bwa DRC, harimo na M23.
Kwiyongera kw’imirwano mu ntara za Ituri, Kivu y’Amajyaruguru, na Kivu y’Amajyepfo, hamwe n’inkunga igabanuka ndetse n’ubuvuzi buke, bibangamira itangwa ry’inkunga rusange ku bagore n’abakobwa barokotse ihohoterwa nk’iryo; kuko ibigo nderabuzima byinshi byabaye ngombwa ko bifunga.
Umuyobozi w’ishami rishinzwe ibibazo, amakimbirane, n’intwaro muri Human Rights Watch, Ida Sawyer, yagize ati: “Imitwe yitwaje intwaro n’ingabo za leta bakoresha ihohotera rishingiye ku gitsina nk’intwaro y’intambara mu burasirazuba bwa DRC.”
Yongeyeho ko abarokotse ibyo byaha biteye ubwoba bahura n’ikibazo cyo kudahana ababibakoreye ndetse na gahunda y’ubuzima idafite amikoro yo kubafasha.
Umuryango Human Right Watch wasabye Igisirikare cya Congo, FARDC, gufata ingamba zose zikenewe mu kongera disipuline no gukumira ihohotera rishingiye ku gitsina.
