Mu gitaramo cyabereye i Kigali mu Rwanda, ku mbuga nkoranyambaga hakomeje kuvugwa amakimbirane yabaye hagati ya DJ Skyla Tyla, ukomoka mu Bwongereza, na Sheila Gashumba, umunyamakuru n’umunyamideli wo muri Afurika y’Iburasirazuba, nyuma y’ubutumwa bwashyizwe hanze nyuma y’icyo gitaramo.
Nyuma yo kuvanga imiziki muri icyo gitaramo, DJ Skyla Tyla yanyujije ubutumwa kuri Snapchat, agaragaza ko atishimiye uko DJ wamubanjirije ku rubyiniro yitwaye. Yavuze ko DJ utari umushyitsi mukuru adakwiye gukina indirimbo zikomeye, ahubwo akwiye gusa gushyushya abantu mbere y’uko umushyitsi mukuru atangira.
Yagize ati: “Mu kinyabupfura, iyo utari DJ mukuru w’igitaramo, ntugomba gukina indirimbo nini kandi zizwi. Buri wese afite inshingano ze; wiyubake gahoro gahoro, wumve uko kuvanga imiziki bikorwa n’uko DJ wo gushyushya abantu agomba kwitwara.”
Aya magambo yafashwe na benshi nk’agaragaza gusuzugura abavanga imiziki bo muri Afurika y’Iburasirazuba, by’umwihariko abo mu Rwanda, aho igitaramo cyari cyabereye.
Sheila Gashumba ntiyacecetse. Yamusubije abinyujije ku rubuga X, amushinja gusuzugura impano z’Abanyafurika no kwiyumva nk’ufite agaciro karenze abandi kubera ko aturutse mu Bwongereza.
Yagize ati: “Mubwire DJ Skyla Tyla ko atari muri Afurika y’Iburengerazuba aho avuga ko bamuramya. Aha ni muri Afurika y’Iburasirazuba, nta mahirwe yihariye ahari.”
Yakomeje avuga ko DJ Skyla Tyla yamufashe nk’umuntu usanzwe atazi, nyamara mu Rwanda no muri Afurika y’Iburasirazuba, abavanga imiziki bafite agaciro kandi bubahwa, kandi badakina bigengesereye.
Yongeyeho ati: “Murakaza neza muri Afurika, aho abavanga imiziki b’Abanyafurika badakina bacitse intege. N’ubundi washyizeho imiziki idashimishije.”
Sheila Gashumba yanavuze ko DJ Skyla Tyla yigeze kugira ubwoba bwo gucuranga ku gihe cye, agasaba gukina hagati mu miziki y’abandi, akabyemererwa, ibintu avuga ko bigaragaza ko atigeze ahabwa akato cyangwa asuzugurwa nk’uko yaje kubigaragaza nyuma.
Aba bakobwa bombi bari bahuriye mu gitaramo New Year Countdown cyabaye mu ijoro ryakeye aho DJ Skyla Tyla yari Dj mukuru muri iki gitaramo mu gihe Gashumba ukoresha izina rya Lil Stunner mu mwuga wo kuvanga imiziki yari munsi ye.
